Kadaugan sa Mactan pormal nang giablihan

CEBU, Philippines - Pormal nga giablihan ang usa ka semanang kalihukan sa ika- 489th nga Kadaugan sa Mactan (KSM) sa miaging Lunes.

Sa mensahe ni Mayor Arturo Radaza nga gibasa ni manlalaban Florito Pozon nagpadasig sa katawhan nga motambayayong sa kalampusan sa maong kalihukan.

 Gipasabot niya nga dili lang kay kombati ug sambunot sa kampo ni Lapulapu ug Magellan ang masaksihan sa tanan, apan ang mahinungdanon mao ang jobs fair karong Biyernes, Abril 23, nga maggiya sa mga walay trabaho nga makatrabaho.

Unya ang naka-aligre sa maong kalihukan mao ang food festival sa matag gabii nga gipasiugdahan sa mga dagkong hotel, restaurant ug resort sa maong dakbayan kansang mga baligyang pagkaon barato ra kaayo nga masarangan ra sa mga nihit og kuwarta.

Si Hember Mondoza ang general manager sa Waterfront Mactan ug maoy chairman sa KSM mibutyag nga 99% sa mga hotel ug restaurant sa Lapulapu ang misalmot niini.

Matag usa kanila mipasundayag sa ilang labing lamiang pagkaon nga puwerting baratoha.

Gumikan sa kamalampuson sa maong kalihokan, nalipay kaayo si Maria Rica Bueno ang director sa departamento sa turismo sa Sugbo ug gidayeg niya ang kakugi nga gipakita sa nagkalainlaing tagdumala sa mga hotel ug dagkong kan-anan sa Lapulapu.

Matud pa niya nga ipahibawo niya kini sa nagkalainlaing nasud sa gawas aron labi silang madasig sa pagsil-ing niini sa mga panahon nga moanhi sila sa nasud.

 Ang mga katawhan wala usay kabalak-an gumikan sa pasalig ni Supt. Mariano Natu-el Jr. ang hepe sa kapolisan sa maong dakbayan nga pabahaan niya og mga polis ang tanang lugar diin himoon ang kasaulogan sa KSM. (BANATNEWS)