CEBU, Philippines - Bisan sa kalungsorang wala sa watchlist sa Commission on Elections ug kapolisan pabutangan gihapon kini og daghang polis.
Matud pa ni Provincial Election Supervisor Atty. Lionel Marco Castillano nga dili lamang ang mga lugar nga gipaubos sa watchlist ang bantayan og maayo sa kapolisan ug militar sanglit nalatid sa election laws nga ang PCOS (Precinct Count Optical Scan) machine kinahanglan bantayan og mga polis.
Si Castillano miingon nga sa higayon nga magkulang ang mga polis, mahimong ilahang padungagan og sundalo gikan sa Central Command o ba kaha sa Regional Mobile Group.
Hinuon giklaro ni Castillano nga i-prioritize ang mga lugar nga ipaubos unya sa watchlist Comelec.
Gipahibawo ni Castillano nga sa pagkakaron ang mga rekomendasyon sa Cebu Provincial Police Office director, Sr. Supt. Erson Digal gikinahanglanon pang i-review sa Comelec -7.
Giawhag ni Castillano ang mga kandidato sa usa ka lugar nga nalakip sa watchlist nga dili kini ikasuko ug likayan ang paghunahunang gubot ang ilang lugar sanglit makapabenepisyo niini ang ilaha mang mga botante. (BANATNEWS)