CEBU, Philippines - Nangayo og pasaylo kang kanhi mayor Thadeo Ouano sa dakbayan sa Mandaue ug sa pamilya niini ang kanhi komentarista sa RMN-DyHP Cebu nga si Joash Dignos ug miangkong walay basehanan ang tanan niyang giluwatan sa kahanginan sa programa niining Birada.
Si Dignos, sa press conference nga gipahigayon kagahapon mipadayag nga dugay na kaayo unta siyang mangayo og pasaylo sa kasaypanan apan gumikan sa kainit sa mga supporter sa mga Ouano naglisod siya paghimo niini hangtud nga napasakaan siya og kasong libelo niadtong tuig 2006.
Si Dignos nangayo og pasaylo pinaagi sa pagbasa sa suwat pahinungod kang Ouano ug kapikas nga si Linda Ouano ug sa tibuok pamilya sa mayor, Provincial Board Member Alfie Ouano ug Cheryl Ouano ug mga anak niini.
“Wala nako damha nga ang akong broadcast sa programang Birada sa DyHP niadtong July 12, 13, 14, 18, 19 ug 21, 2006 nakahimo og di makatarunganong pasangil nga si Mayor Teddy ug ang iyang umagad nga si Cheryl adunay tinagoang relasyon.”
“Di kini tinuod ug kadtong tanan tumo-tumo lamang, way basihanan ug way kamatuoran. Nga ang akong tuyo sa maong broadcast mao lang ang pagkulit og ngalan sa natad sa broadcasting tungod sa kompetisyon sa pagpanibya dinhi sa Sugbo,” matud pa sa tipik sa iyang suwat.
Niadtong tungura si Dignos maoy gihulip sa kasamtangan karong manager sa DyHP nga si Atty. Ruphil Bañoc nga mikuha niadtong panahona og pasulit sa abogasiya. Matud pang Dignos gusto lamang siyang mokulit og pangalan sa kahanginan apan wala damhang nakapasakit siya og tawo sa iyang komentaryo.
Si Atty. Gloria Lastimosa-Dalawampu nga abogado ni Ouano miingon nga ang pag-angkon ni Dignos tataw nga walay gihimong law-ay ang iyang kliyente ug kun ipadayon ang kaso lig-on ang basehanan sa korte aron silotan ang maong komentarista.
Si Ouano sa iyang bahin nagkanayon nga nahasol ug naeskandalo gyud siya ug iyang pamilya sa maong komentaryo apan ang pag-angkon sa sayop niining nahimo ug pagpangayo og pasaylo andam usab siyang modawat niini sanglit ginaingon man nga ang pagpakasala tawhanon ug ang pagpasaylo balaanon.
Pinaagi ni Bañoc isip taytayan, natigayon ang pagpangayo og pasaylo ni Dignos ug nakigkita sila kagahapon kang Ouano ug naglamanohay diha sa ilang panimalay. – BANAT NEWS