CEBU, Philippines - Usa ka retiradong polis, ug lain pang molupyo sa dakbayan sa Talisay nabiktima sa pagpanglungkab sa managlahing barangay ug oras sa maong dakbayan sa miaging adlaw.
Usa sa mga biktima mao si kanhi Police Inspector Jesus Basco Jr., 59, nga taga Lovely Homes, barangay Mohon, sa maong dakbayan kinsa mitaho sa Talisay City Police Station nga nakabantay siya nga gitangtang sa wala hiilhing kiriwan ang screen ug blade sa jalousy sa ilang bintana.
Matud pa niya nga didto moagi ang kawatan ug gisakiyo ang iyang .38 kalibre ARMSCOR revolver, usa ka Cannon nga digital camera ug charger niini nga nagkantidad og P17 mil, ug Citi Bank Credit Card.
Ang laing nabiktima sa lungkab mao usab si Melanie Lumanda, 29, nga taga sitio San Miguel, barangay Linao dihang gikiriw sa pilit og kamot ang iyang Sony digital camera nga nagkantidad og P20 mil, usa ka Kenwood stereo, nga P10 mil, usa ka parisan sa Chinese gold nga ariyos, nga balor usab og P5 mil, gameboy nga P4 mil ug professional pen nga P5 mil.
Mao gihapoy modus sa kiriwan nga mitangtang sa blade sa jalousy sa iyang bintana hinungdan nga nakasulod kini sa balay ug nadala ang maong mga butang.
Ang maong mga insidente nahitabo samtang ang mga biktima wala diha sa ilang balay.
Sa pagkakaron gipanid-an kining mga kawatan sa kapolisan sa maong dakbayan. (BANATNEWS)