CEBU, Philippines - Giangkon ni Cebu Archbishop Ricardo Cardinal Vidal nga adunay kapariang nahisalaag sa dalan ug mihulagway nga kun dili sila mag-mainampuon duna gyuy dili maayong mga hitabo.
Kini maoy iyang reaksyon sa nagpadayong espekulasyon kabahin sa kamatayon ni Rev. Fr. Alexander Silvano Villamor Salve kansang patay’ng lawas napalgang nag-brief na lamang sulod sa usa ka lawak sa usa ka pension house sa dakbayan sa Sugbu niadtong milabay’ng Miyerkules sa gabii.
“We can’t deny that there are some lapses. Human as we are, if we are not prayerful…something would happen,” matud pa niini sa interbyu sa TV Patrol Central Visayas kagahapon.
Samtang kabahin sa mga bati nga espekulasyon sa kamatayon ni Salve diha sa usa ka pension house, si Vidal nagkanayon nga wala nay kahigayunan pang makatubag pa ang maong pari sa mga pangutana ug pasangil batok niini gumikan kay patay naman kini.
Miawhag hinuon siyang angayang respetuhon nalang ang mitaliwan, apan base sa iyang nadawat nga impormasyon si Salve gikan sa pagtuman sa iyang apostolate ug igo rang mipahuway.
“He came to rest after his apostolate…they should respect the dead, because you can’t expect answers from the dead,” pasabot pang Vidal.
Ang kapolisan padayon pang nangita sa duha ka babayeng gihulagway nga 20 ngadto sa 25 pataas ang pangidaron nga maoy mipahibalo sa gwardiya sa maong pension house sa nahitabo sa maong pari.
Samtang mipadayag si Sr. Supt. Patrocinio Comendador nga ilang respetuhon ang desisyon unya sa kabanay ni Salve nga dili kini ipa-autopsy, ang kapolisan sa pasiunang pagsusi sa patay’ng lawas wala makakita og foul play sa patay’ng lawas niini.
Sa Santos nga Misa sa Santo Tomas de Villanueva niadtong milabay’ng gabii, si Msgr. Esteban Binghay, Episcopal Vicar sa Sugbu nipahimangno sa kaubang kaparian nga mangandam kanunay sa pag-abot nga sila mobalik na sa Magbubuhat.
Ang patay’ng lawas ni Salve gidala na kagahapon sa lungsod sa Carmen ug gidala sa Saint Agustin Parish Church diin gisugat sa iyang mga katigi-lungsod nga nagbitbit og putting banderitas.
Ang mga kabanay ug nakaila ni Salve dili makadawat sa mga balitang nanggawas nga may kaubang babaye ang maong pari atol sa pagkamatay niini gumikan kay dili kini maoy pagkaila nila kang Salve.
Ang drayber ni Salve sa interbyu sa Balitang Bisdak kagahapon mitin-aw sa mga pangutana kabahin sa pagsulod sa maong pari sa hotel tungod kay naandan na niya kini panahon nga siya kapuyon sa dili gustong makahasol sa mga kaubang pari kun magabin-an siya og pauli gikan sa iyang mga lakaw.
Samtang kabahin sa paggamit niini og alyas, giklaro niining mao gyud kini sagad buhaton ni Salve kun mosulod og hotel sa matag dapit nga adtoan niini tungod kay dili kini buot nga hatagan og special treatment sa mga hotel tungod lamang kay siya usa ka pari. – BANAT NEWS