Erap gidugok sa Lapu

CEBU, Philippines - Gihugopan sa mga residente sa Lapulapu ang proclamation rally sa Partido ng Masang Pilipino (PMP) sa barangay Basak sa maong dakbayan.

Gihulagway sa mga lider sa PMP nga miabot ngadto sa 30 mil ka mga tawo ang mitambong sa rally diin pormal usab nga gideklarar ni PMP standard bearer, kanhi Presidente Joseph "Erap" Estrada ang iyang gisuportahang lokal nga kandidato sa Lapulapu.

Ang pormal nga gideklarar ni Erap mao ang kandidato pagka-mayor nga si kanhi Kapitan Isabelito Darnayla sa Basak ug duha niini ka konsehal nga sila si kanhi LTO Lapulapu field office chief nga si Cleto Abugan ug Norma Ebena Casul.

 Atol sa rally, ang mga kandidato pagka-senador pormal nga nagpakita sa ilang mga dumadapig diin upat ka mga kandidato ang mikuyog ni Estrada nga sila si Rodolfo “Ompong” Plaza, JV Bautista, Francisco “Kit” Tatad ug Jun Lozada.

Samtang ang ubang kandidato girepresentahan lamang kini sa ilang mga anak sama ni Gen. Danny Lim nga si Ika Lim ang mibarog sa tablado, samtang ang anak ni Ramon "Bong" Revilla mao usab ang mirepresentar kaniya atol sa maong rally ug ang suod nga higala ni Erap nga si Eddie Garcia maoy naghatag og inspirasyon sa katawhan atol sa iyang pakigpulong.

Sa sayo pa, unang namulong sa iyang plataporma si Jejomar Binay nga nagpapiling bise presidente sa nasud diin matud pa niini nga kun nahimo niya sa Makati nga libre ang tanan posibleng mahimo niya kini sa nasud.

Atol sa diskurso ni Estrada subling gipadayag ngadto sa katawhan nga sa nagkaduol na nga gutlo sa iyang kinabuhi iya kining i-alagad sa katawhang Pilipino pinaagi sa paghuman sa iyang termino isip presidente sa nasud.

Ang kampo ni Manny Villar gisaway ni Estrada gumikan sa ilang propaganda sa katawhan nga sila anak og pobre apan usa diay ka bilyonaryo.

Samtang si Aquino gisaway usab ni Estrada gumikan kay nagdalidali og sanong sa awhag sa iyang mga dumadapig nga modagan pagka-presidente gumikan kay wala pa kini sa saktong kahinog sa pagdumala sa nasud.

Matud pa ni Estrada ang pagka-presidente dili sama sa usa ka butang nga kun dili na gustong gamiton ihatag sa suod sa pamilya.

Usa sa kamatuoran nga pinangga pa gihapon kini sa katawhan mao ang pagdaog sa iyang kapikas nga si kanhi Senador Loi Ejercito ug sa iyang anak nga si Senador Jinggoy Estrada ug gihimo kining rason sa kanhi presidente nga anaa gihapon ang pagsalig sa mga Pilipino ngadto kaniya. – BANAT NEWS