CEBU, Philippines - Gi-dismiss sa Sandiganbayan second division ang kasong kriminal nga gipasaka batok ni kanhi Mayor Thadeo Ouano sa Mandaue ug mga opisyal sa Department of Public Works and Highways tungod sa kontrobersiyal nga overpricing sa lamppost nga gigamit sa 2007 ASEAN summit.
Sa tulo ka pahina nga “denial” sa motion for reconsideration sa Ombudsman, kini nagkanayon nga ang dismissal sa kaso batok ni Ouano “with prejudice” na ug dili na angay ipasaka og balik.
Sumala pa sa resolusyon nga na-promulgate niadtong Marso 24, 2010 ug gipirmahan ni Sandiganbayan acting presiding justice Edilberto Sandoval, associate justices Teresita ug Samuel Martires, nga gipaminaw na nila ang habig sa prosekusyon nga wala maka-establisar sa salaod batok sa mga akusado.
Ang resolusyon nagkanayon nga ang Ombudsman angay unta mo-imbestigar ug mo-prosecute, apan dili angay mo-abuso sa gahum nga gihatag niini sa Konstitusyon.
“A reading of the records of this case would present circumstances which would indicate that the manner in which the investigation was handled was hasty and injudicious,” matud sa resolusyon.
Dugang pa niini nga ang Ombudsman dili kumbinsido sa pag-prosecute sa kaso nga angay unta nila i-prosecute.
Kauban ni Ouano sa kaso mao silang DPWH-7 regional director Robert Lala, Gloria Dindin, Marlina Alvizo, Pureza Fernandez, Agustino Hermosa, Luis Galang, Cresencio Bagolor, Buenaventura Pajo ug Restituto Diano. - BANAT NEWS