CEBU, Philippines - Ang Regional Tripartite Wages and Productivity Board (RTWPB)7 mitumbok kagahapon nga hanap kaayong matubag nila niining buwana ang petisyon nga gisang-at sa mga mamumuo bahin sa gipangayo nilang usbaw sa suweldo.
Sumala ni Regional Director Elias Cayanong sa Department of Labor and Employment (DOLE-)7 kinsa sa samang higayon kasamtangang RTWPB chairman, nga ang desisyon sa wage board kalabot sa petisyon sa duha ka labor sector nga nangayo og usbaw sa suhol dili ikapakanaog sa dili pa ang Labor Day sa Mayo l.
Kini tungod kay malangay ang ilang ipahigayon nga konsultasyon sa mga kapitalista ug mga negosyante dinhi sa Central Visayas, matud pa niya.
Miingon si Cayanong nga niadtong adlaw’ng Huwebes, ang mga nagdumala sa mga malls ug department stores mihangyo usab sa wage board nga ilakip usab sila sa konsultasyon nga ilusad sa RTWPB sanglit apiktado man usab sila sa wage hike nga gipangayo sa mga mamumuo.
Sa sayo pa ang grupo sa Alliance of Progressive Labor (APL) nangayo sa wage board og P128 nga usbaw sa suholan matag adlaw samtang ang Associated Labor Union (ALU) nangayo usab og P100 nga umento alang niining tuiga.
Si Cayanong mihangyo ngadto sa sector sa mga mamumuo nga dili lamang magdalidali ug magbaton lang sila og pasensiya sa pagpaabot sa desisyon sa RTWPB.
Iyang gipasalig sa mga mamumuo nga ihatag nila ang makiangayong desisyon sa petisyon sa duha ka mga labor union alang sa usbaw sa suholan niining tuiga. (BANATNEWS)