Gipundong tubig ug dili piggery ang posibleng tinubdan sa lamok

CEBU, Philippines - Mga gipundong tubig tungod sa huwaw ug ang piggery diha sa lugar maoy gidudahang tinubdan sa dengue sa barangay Tapul diin lima ka bata na ang nakompirmang nabiktima niini ug laing pito ang gidudahang dunay dengue.

Ang maong hitabo nagsugod niadto pang buwan sa Enero niining tuiga kinsa ang tres-anyos nga si Ryan Kristof Bacus ang unang nabiktima.

Si Talisay City administrator Richel Bacaltos sa pakighinabi niini sa Banat News nagkanayon nga ang mga residente sa lugar nagdudang diha sa piggery naggikan ang mga lamok nga nagdala og dengue.

Apan matud ni Bacaltos base sa pamahayag sa city health, ang mga lamok nga nagdala og dengue dili kini mopundo sa hugaw nga tubig ug kung ugaling dunay ipundong tubig diha sa piggery dili usab kini magdugay tungod kay matandog man kini panahon nga manglimpiyo sa mga tangkal.

Tungod niini mas gidudahan nila karong posibleng ang gipundong mga tubig sa kabalayan tungod sa huwaw maoy tinubdan sa mga lamok ilabi na niadtong walay mga takob.

Ang mga residente sa lugar tungod sa kanihit og tubig sa sobrang huwaw magpundo gyud kini og mga tubig aron dili mahutdan sa ilang inadlaw nga gamiton.

Ang city health office pinangulohan ni city health officer Dr. Lino Alanzado misaka na ngadto sa barangay Tapul ug nipahigayon og “mist spraying.”

Si Bacaltos miawhag sa mga Talisaynon nga magmabinantayon gyud aron wala nay lain pang mabiktima sa dengue.

Bisan og kaniadto pang nagsige og subli-subli sa mga pamaagi paglikay sa dengue gisubli na usab ni Bacaltos karon nga manglimpiyo sa palibot ug ipanghuwad ang mga tubig nga nagpundo diha sa mga flower vases ug mga ligid ug ang mga gamiton nga tubig nga gipangpundo ang butangan gyud kini og takob.

Kahinumduman nga sa milabay’ng mga buwan usa ka bata ang namatay sa dengue diha sa barangay Cansojong, ang maong dapit adunay daghang katangkongan.