CEBU, Philippines - Gihagit ni Lapulapu City Police Office director Sr. Supt. Mariano Natu-el Jr. si kanhi Punta Engaño Kapitan Angel Rodriguez nga mopakita og kopya sa warrant of arrest sa lima ka mga bodyguards ni incumbent Lapulapu City Mayor Arturo “Boy” Radaza kay iya kining sikupon.
Matud pa ni Natuel hangtod walay kopya sa warrant of arrest batok nila ni Nicasio Rodellas Jr., Alejandro Veloria, ug naila lang sa mga pangalang Bantilo, Siyang ug Temorata,mga residente sa Punta Engaño nga pulos giingong nag-atubang og kasong murder ug wanted dili niya kini masikop.
Nagduda si Natu-el nga kung tinuod man nga adunay kaso ang lima posibleng nakaangkon kini og pagtugot sa korte nga makapiyansa.
Samtang si Paz Radaza ang kandidato pagkamayor sa dakbayan sa Lapulapu ubos sa Lakas Kampi-CMD mipadayag nga dili kalikayan nga si Rodriguez isip tigpaluyo na karon sa kampo ni Junard “Ahong” Chan sa partidong NPC mangita gyud og mga pamaagi ug rason nga makadaot sa kandidatora sa iyang bana (Mayor Radaza).
Gihagit ni Radaza si Rodriguez nga kung adunay nahimong kalapasan ang bana sa pagtinir og mga kombiktado o wanted nga tawo mas maayong mopasaka kini og kaso batok sa iyang bana.Gipanghimakak usab ni Paz Radaza ang kalambigitan sa mga kadudahang tawo nga gikan sa Mindanao nga nanghasi didto sa Isla sa Olango ug sa dakbayan sa Lapulapu sa mga kaatbang niini sa politika.
Kahinumduman nga si Rodriguez atol sa usa ka press conference sa milabay’ng adlaw mibutyag nga adunay lima ka mga wanted nga tawong nagserbisyo ug gisweldohan sa kagamhanang lokal sa Lapulapu isip bodyguard ni Radaza. – BANAT NEWS