CEBU, Philippines - Nagpabiling blangko ang kapolisan sa pag-ila sa mga responsable sa pagpangrakrak sa balay sa tresurera sa barangay Malingin, dakbayan sa Bogo sa miaging kaadlawon.
Si SPO1 Allan Dosdos, imbestigador sa kapolisan sa nahisgotang dakbayan miingon nga ang maong tresurera nga si Marilyn del Fiero Catadman, 50, wala gyud makasabot nganong girakrakan ang ilang balay.
Iyang gipahayag nga wala siya’y kontra ug wala siya masayod nga may mga tawong nagdumot kaniya ug sa iyang pamilya.
Sa samang higayon gipahayag usab ni Dosdos nga usa lang ka pagpanghadlok ang gihimo sa maong mga tawo tungod kay mga bongbong ra man sa balay maoy gitirahan niini.
Busa alang kaniya wala kini tuyo nga mopatay sa tresurera ug sa mga anak niini kay wala man ipunting ang mga bala sa mga nangatulog nga pamilya.
Sa pagkakaron gipanid-an pa sa kapolisan ang maong mga tawo ug nagtuo si Dosdos nga sa madugay ug sa madali masayran ra gihapon nila kini. – BANAT NEWS