Dili "I love, how much" ang pagpili og kandidato - Rory

CEBU, Philippines - Ang tigpamaba sa Kapitolyo nga si Rory Jon Sepulveda mihimakak nga may presyo ang pagpili sa One Cebu Party og kandidato sa national positions.

Matud pa ni Sepulveda sa interbyu sa DyRF nga dili tinuod ang pasangil sa mga kaatbang nga “I love, how much” nga polisiya ang ilang pagpili og mga kandidato. Hinungdan nga daw ‘chopsuey’ ang talaan sa ilang mga national candidates sanglit naggagikan man sila sa nagkalain-laing partido.

Nasayran nga ang napiling 12 ka mga kandidato sa pagkasenador nga suportahan sa One Cebu Party mao ang tulo ka mga kandidato sa Nationalista Party nga mao sila si Kongresista Gilbert Remulla, Bongbong Marcos ug manlalaban Adel Tamano.

Tulo usab gikan sa Lakas-Kampi-CMD nga mao sila si Senador Lito Lapid, Bong Revilla, ug Ramon Guico. Tulo ang gikan sa Puwersa ng Masa ng Pilipinas (PMP) nga sila si Senate President Juan Ponce Enrile, Senador Jingoy Estrada, ug kanhi Senador Francisco “Kit” Tatad.

Duha ang gikan sa Liberal Party (LP) nga si kanhi senador Franklin Drilon, ug Ruffy Biazon kansang pagbutyag gipugngan unta tungod kay wala siya makatunga sa naasoy nga kalihukan ug kanhi senador Tito Sotto sa Nationalist People’s Coalition (NPC).

Matud pa ni Sepulveda nga gibasehan pagpili sa mga senador mao ang kun unsay ilang mahatag sa Sugbu ug kinahanglang mohangyo sa partido nga suportahan sila sa ilang tagsatagsa ka mga kandidatura.

Giklaro usab ni Sepulveda nga dili sila mosuporta sa mga kandidatong wala moduol ug nangayo og suportar sa partido kay mahimong walay bili ang suporta sa Sugbu kay dili kini mapaninglan sa ilang panaad alang sa kalambuan sa Sugbu sa higayon nga mapili na sa national nga posisyon. (BANATNEWS)