CEBU, Philippines - Gidunggab ug giluglog pa ang liog sa usa ka 26-anyos nga dalaga sa iyang kapuyo sulod sa gi-abangang pinuy-anan diha sa barangay Panadtaran lungsod sa San Fernando kagahapon sa alas 9:40 sa buntag.
Ang biktima mao si Maricel Aropo, 26, lumad nga taga Tugbongan Garcia Hernandez, Bohol apan kasamtangang nagpuyo sa maong lugar ug kapuyo sa suspek nga nailhan lang sa pangalan nga Benjie.
Matud ni PO3 Marjukin Misuari sa San Fernando Police dihang nahinabi sa Banat News subay sa imbestigasyon, ang biktima ug ang kapuyo niining suspek nagkalalis sulod sa ilang giabangang lawak sa wala pa ang hitabo.
Dangtan og pipila ka mga oras nakadawat nalang og text message si barangay councilor Edward Natividad kabahin sa patay’ng lawas sa biktima nga nadiskubrehan sud sa ilang gi-abangang lawak nga nagkadugo ug nabulit og dinunggaban ang kalawasan ug giluglog pa ang liog niini.
Ang mga mirespondeng pulis nakakuha sa kutsilyong naibot na sa puloan ug nagkadugo ingon man usa ka itom nga nagkadugong shorts nga gituuhang iya sa suspek ang napalgan diha sa crime scene.
Ang mga silingan sa biktima wala na makakita sa kapuyo sa naulahi sukad nga nakit-an ang patay’ng lawas sa babaye ug gituuhang daling misibat human sa krimen. Padayon pa ang imbestigasyon sa kapulisan pagtumbok sa motibo sa krimen ingon man nagpadayun pa usab ang hot pursuit operation batok sa suspek nga nailhan sa kapulisan pinaagi sa picture niini nga nahabilin sa crime scene.
Dugang ni PO3 Misuari bag-ohay pang namuyo sa maong lugar ang duha hinungdan nga wala pa kaayo’y nakailang mga silingan kanila. (BANATNEWS)