CEBU, Philippines - Ang One Cebu Party nga gipangulohan ni Gobernador Gwen Garcia hingpit nang mipahibawo nga ang iyang gipiling bise presidente mao si Senador Loren Legarda sa Nacionalista Party (NP).
Ang opisyal nga pahibawo gihimo ni Garcia atol sa proklamasyon sa One Cebu Party sa miaging adlaw uban sa kandidato sa administrasyon Gilbert “Gibo” Teodoro sa pagka-presidente sa nasud, Glenn Soco, kandidato sa pagka-bise gobernador ug Luigi Quisumbing kandidato sa pagka-Representante sa ika-unom nga distrito sa lalawigan sa Sugbo, human sa inugurasyon sa Headquarter ni Quisumbing didto sa PCIC, Complex, sa dalan A.S Fortuna, sa barangay Bakilid, dakbayan sa Mandaue .
Sa samang higayon gipahibawo usab ni Garcia ang giingong 12 ka "chopsuey" nga mga kandidato sa pagkasenador nga napilian sa One Cebu Party.
Kini naglangkob sa tulo ka mga kandidato sa pagkasenador nga nagagikan sa NP nga mao sila si Kongresista Gilbert Remulla, Bongbong Marcos ug manlalaban Adel Tamano.
Tulo usab gikan sa Lakas-Kampi-CMD nga mao sila si Senador Lito Lapid, Bong Revilla, ug Ramon Guico.
Tulo ang gikan sa Puwersa ng Masa ng Pilipinas (PMP) ni kanhi presidente Joseph Estrada nga gilangkoban nila ni Senate President Juan Ponce Enrile, Senador Jingoy Estrada, ug kanhi Senador Francisco “Kit” Tatad.
Duha ang gikan sa Liberal Party (LP) nga si kanhi senador Franklin Drilon, nga gipresentahan sa iyang asawa nga si Mila Drilon ug si Kongresista Ruffy Biazon kansang pagbutyag gipugngan unta tungod kay wala siya makatunga sa naasoy nga kalihukan.
Lakip sa maong listahan mao si kanhi senador Tito Sotto sa Nationalist People’s Coalition (NPC).
Matud pa ni Garcia nga gipili nila ang maong mga kandidato tungod sa mga maayong plano niini alang sa dugang kalambuan sa Sugbu, ug ang pagsuporta nila sa kinatibuk-ang agenda sa One Cebu Party.
Samtang si Teodoro dihang gipangutana kun ganahan ba siya nga makig-uban sa mga kandidato nga naggikan sa nagkalainlaing partido, kini mitubag nga dinhi gipakita lang sa administrasyon ang kaandam niining makig-uban ni bisan kandidato basta ang tumong alang lang sa pagpalambo sa kaayohan sa nasud.
Si bahin ni Sotto kini miingon nga komportable kaayo siya sa pagpakig-alayon kang Garcia ilabi na nga usa usab siya ka Sugbuanon.
Si Bongbong Marcos miingon usab nga ang gihimo sa gobernadora sa pagpili sa mga kandidato sa pagkasenador gikan sa nagkalainlaing mga partido nagpakita lamang nga ang gobernadora nagsubay sa paningkamot alang sa kahiusahan sa nasud ug dili sa pagbahinbahin ug mao kini ang iyang tinguhaon kun makalingkod siya sa senado.
Si Enrile miingon usab nga ang gihimo ni Garcia nagpakita lamang sa iyang tin-aw nga liderato nga komitido sa maayong pangagamhanan ug kalambuan sa Sugbu ug angayan nga sagupon usab sa tibuok nasud.
Samtang si Tatad nagkanayon nga ang Sugbu nga gipangulohan ni Gobernador Garcia nagtudlo sa mga politiko sa tibuok nasud unsaon ang pagkab-ot sa panaghiusa. - BANAT NEWS