Inday Neri mi-resign sa LAKAS-KAMPI

CEBU, Philippines - Si Kongresista Nerissa Soon-Ruiz sa ika-unom nga distrito nga kandidato pagka-mayor sa dakbayan sa Mandaue, miduso sa iyang resignasyon sa administration party Lakas-Kampi-CMD.

Wala gitataw ni Soon-Ruiz nga mosuporta siya ni Sen. Manny Villar sa Nacionalista Party, apan gitataw niini nga si Villar ug iyang asawa nga si Kongresista Cynthia Villar kaniadto pa nagtabang sa mga Mandauehanon.

Sa sulat pamahayag nga gipadala ni Soon-Ruiz sa Banat News, kini nagkanayon nga andam usab siyang mosudo og “courtesy resignation” sa One Cebu party nga gipanguluhan ni Gob. Gwendolyn Garcia.

Giklaro hinuon sa pamahayag nga si Soon-Ruiz magpabiling moduso sa kandidatura ni Garcia ug sa iyang tandem nga si Glen Soco.

Sa iyang pamahayag, si Soon-Ruiz nagkanayon nga ang iyang desisyon iyang gipakanaog human sa makuting kunsultasyon sa iyang mga kaubang Mandauehanon kun kinsa ang kandidato pagka-presidente ang ilang suportahan.

“After consultation with my leaders and political allies in Mandaue city, I realized that most, if not all of them would like to support a presidential bet that has the interest of our city in his heart,” matud sa pamahayag.

Sumala pa sa pamahayag ni Soon-Ruiz nga ang iyang “working relationship” sa mga Villar makahatag og kaseguroan sa mga Sugboanon.

“I want the city to progress even surpass its neighbors because at this time we are lagging behind. The city’s growth and development has stalled because the administration has no vision and the needed leadership to bring it to new heights.”

Samtang gipasalig ni Soon-Ruiz nga dili siya mo-undang sa pagsuporta kang Garcia ug iya gihapon ikampanya sa siyudad sa Mandaue si Glenn Soco sa pagka-bise gobernador.

Sumala pa sa mga tigpaniid sa politika sa Mandaue nga angayan lamang mogawas si Soon-Ruiz gikan sa One Cebu party tungod kay si Garcia kanunay nga makit-an nga magkuyog si Mayor Jonas Cortes.

Matud sa maong tigpaniid nga paneguro ang gihimo ni Garcia nga nagsuporta kang Soon-Ruiz nga sakop sa iyang partido ug nag-uban-uban ni Cortes. - Lesley Caminade (BANAT NEWS)