Loren maayo sa scripted drama-Liberal

CEBU, Philippines - Gihulagway sa dakong opisyal sa partido Liberal si Senador Loren Legarda nga angayan mahimong direktor ug scriptwriter alang sa drama series tungod sa paggamit na og “scripted drama” karon nga mitibugsok ang iyang survey rating, ug ang mga respondent mopili og laing vice presidential candidate sama ni Sen. Mar Roxas sa Liberal.

Si LP director deneral Chito Gascon miingon nga si Legarda mahimo nang mogamit sa nakamahoan isip mass communications graduate sa paghimo og script alang sa iyang kampanya pagguba sa reputasyon ni Roxas, kinsa maoy nag-una nga kandidato pagka-bise presidente alang sa 10 nga eleksiyon.

Base sa Social Weather Stations ug Pulse Asia, Inc. surveys, si Roxas nag-una og 14 ngadto 17 porsiyento puntos o tugbang sa lima ngadto sa walo ka milyon nga botos kun mag-eleksiyon karon.

Si Gascon mitumbok nga usa ka script nga kanunay’ng gigamit ni Legarda mao ang drama niini sa mga merkado diin mokuha siya og mga supporters aron mo-acting isip reklamante nga si Roxas wala makatuman sa iyang saad sa mga botante.

Gihimong sanglitanan ni Gascon ang pagduaw ni Legarda sa Carbon public market ning dakbayan diin gipadrama ni Legarda ang usa ka Clarita Estrada sa pagreklamo ug naghilakhilak atubangan sa camera nga nagkanayon nga si Roxas wala motuman sa iyang saad nga pabarugon ang nasunog nga merkado sa Carbon.

Apan ang script ni Legarda, matud ni Gascon, mi-backfire kaniya human ang Cebu Market Vendors Cooperative (CEMVEDCO) sa Carbon mihimakak sa reklamo ni Estrada.

Ang Cemvedco mipadayag sa ilang hugot nga suporta kang Roxas.

Si Antonio Piloton, tsirman sa Cemvedco miinsister nga si Roxas wala mosaad nga motabang pagpabarog og bag-ong merkado alang sa mga vendors sa Carbon.

Si Piloton mihulagway kang Estrada nga usa ka adunahan nga fruit vendor nga nag-abang og kaugalingong warehouse sa P14,000 matag bulan, nagmaneho sa iyang Toyota Revo ug adunay duha ka multicab sa iyang mga deliveries. 

Si Mayor Tomas Osmeña miklaro usab nga ang proyekto pagpabarog sa Carbon market gi-oktaba tungod sa problema sa lokal nga kontraktor. (BANATNEWS)