Resulta sa imbestigasyon sa NBI -7 sa balili ipublikar
CEBU, Philippines - Si Gob. Gwendolyn Garcia misaad nga karong semanaha niya ipapublikar ang resulta sa imbestigasyon sa National Bureau of Investigation -7 kabahin sa kontrobersyal nga pagkapalit sa Kapitolyo sa Balili Lot.
Ang imbestigasyon gipangulohan mismo ni NBI-7 regional director Medardo Delemos human daghang mga mireklamo kabahin sa pagkapalit sa maong luna sa Tinaan, Naga nga giingong nalubog sa tubig ug kabakhawan.
Sumala pa ni Garcia nga hasta ang mga rekomendasyon sa maong imbestigasyon iyaha usab nabasa ug gihimoan na usab na og aksyon.
Aron dili magduda ang katawhan nga may gitaguan ang Kapitolyo sa maong kontrobersiya hasta ang media hatagan og kopya niini.
“I read it, I am already taking some action... any way rest assure within this week we will release to the media the contents of the report including the proper action that we had taken on the recommendation of the report,” dugang pasabot sa gobernadora.
Nagdumili na hinuon ang gobernadora sa paghisgot kun si kinsa ang gibasol sa maong kontrobersiya ug unsay pagahimuon kanila sa gobernadora.
Kini bisan pa man og si Delemos mitug-an sa mga sakop sa media nga usa sa natumbok nga may tulubagon mao si Provincial Board member Juan Bolo nga maoy gitumbok nga nag-broker aron daling mapalit ang lote. (Chester Abadilla) (BANATNEWS)
- Latest
- Trending
