CEBU, Philippines - Mibahad si kandidato pagka-presidente Gilberto “Gibo” Teodoro sa Lakas-Kampi-CMD nga dili siya mohunong sa kampanya hangtod nga dili siya mahimong numero uno.
Kini dihang nasuta niya nga misaka na siya sa ikaduhang puwesto sa labing awahing survey sa mga kandidato sa paka-presidente sa umaabot nga piniliay sa Mayo.
Ang survey nga gipahigayon sa Campaigns and Image Group nagpakita nga misaka si Senador Manuel Villar sa Nacionalista Party (NP) ngadto sa numero unong posisyon, samtang si Senador Benigno “Noynoy” Aquino III maoy natagak.
Matud pa sa Campaigns and Image Group nga inigsaka sa rating ni Gibo mao na usab kini ang sumbanan sa iyang hingpit nga kadaugan sa umaabot nga election aron kakoronahan isip bag-ong presidente sa nasud nga Pilipinhon.
Ang survey sa Campaigns and Image Group nga giabagan usab sa Parish Pastoral Council for Responsible Voting ug natapos niadtong Pebrero 27, nagbutyag nga samtang misaka sa 31 porsiyento ang rating ni Villar, ang kang Gibo 24 porsiyento, ang kang Noynoy misukarap ngadto sa 20 porsiyento, Joseph Estrada 13 porsiyento, Richard Gordon 5 porsiyento ug Eddie Villanueva 2 porsiyento. – BANAT NEWS