Tubig sa prisohan sa Lapulapu, Naga hugaw - BJMP

CEBU, Philippines - Ang mga opisyales sa Bureau of Jail Management and Penology kon BJMP dinhi sa Central Visayas miangkong hugaw ang tubig nga gigamit sa bilanggoan sa Lapu-lapu ug sa Naga ug ingon man sa Bayawan, Negros Oriental.

Kini maoy ilang nasayran sa resulta sa gihimong Water Bacteriology test sa mga tinubdan sa tubig sa tanang mga bilanggoan nga gidumala sa BJMP-7.

 Ang hepe sa Community Relation Service nga si Sr. Insp. Mary Jane Inopia miingon nga ang tinubdan sa tubig nga gigamit sa bilanggoan sa dakbayan sa Lapu-lapu, Naga ug Bayawan sa Negros Oriental positibong may coliform bacteria.

Ang coliform bacteria usa ka klase sa mga bacteria nga sagad makuha sa mga hugaw, ihi sa mananap, tawo, pan-os nga pagkaon ug tubig sama sa makasakit ug makamatay nga Escherichia Coli (e-coli bacteria).

Sigon sa report nga 14 ka mga jail facilities sa Central Visayas ang ilang gipaubos sa water bacteriology test pagsigurong luwas ang tubig nga gamiton sa pag-inom sa mga piniriso.

Tungod sa maong resulta sa test, gimandoan na ang mga jail wardens sa nahisgutang mga bilanggoan nga mga tubig sa water dispensers o ba kaha pinabukalang tubig na lamang maoy ipainom sa mga bilanggo, samtang ang tubig nga ilang naandang gamiton mao nalay ipanglaba ug ikaligo ug uban pa.

Samtang aron malimpyuhan ug mapatay ang mga kagaw sa ilang tinubdan sa tubig gimando na usab ang pagbutang og chlorine sa ilang tinubdan.

Sa laing bahin, gibutyag ni Inopia nga pipila sa mga bilanggo na usab ang gikatahong nangataptan karon og daghang sakit lakip na niini ang mga bilanggo sa Cebu City Jail sama sa ubo, hilanat ug hubag (mata’g tiki).

Gidudahang bunga kini sa labihang kainit sa panahon ug dili tungod sa kahugaw sa tubig. - Chester Abadilla (BANAT NEWS)