CEBU, Philippines - Patay nang nadangat sa tambalanan ang usa ka 22-anyos nga lalaki human kini pusila sa usa ka wala mailhing lalaki kagahapon sa kaadlawon diha sa usa ka imnanan sa barangay Lagtang, dakbayan sa Talisay.
Ang biktima mao si Jerson Lastimosa, taga barangay Camp 2, Talisay kinsa nakaangkon og samad pinusilan sa tuong mata ug patay nang nadangat sa Talisay City District Hospital.
Sila si PO2 Epifanio Comendido ug PO1 Jundave David sa gihimong imbestigasyon nagkanayon nga kainom sa biktima ang kaluha niining si Jovel sa nahisgutang tindahan dihang giduol sa biktima ang pikas lamesa ug mipasingit sa nanag-inom niini.
Gikatahong ang menor de edad nga kainom sa pikas lamesa kanhi uyab sa biktima maong nasuko ang mga kauban sa babaye ug dihang nabalik sa lamesa ang biktima giduol kini sa usa ug gipusil ang mata niini.
Nagduda karon ang kapolisan nga posibleng love triangle ug paregla maoy motibo sa krimen samtang gipangita pa nila ang mga gikatahapan. - Brenda Batuto (BANAT NEWS)