CEBU, Philippines - Ang mga tinugyanan sa Visayan Electric Company (VECO) ug Aboitiz group of companies maoy mangulo sa Earth Hour sa Sugbo karong Marso 27.
Si Ethel Natera, tigpamaba sa VECO nagkanayon nga ang Earth Hour usa ka kalibutanong kalihukan kanus-a palungon ang mga suga sulod sa usa ka oras aron pagpakita sa katawhan nga kini nahibalo sa kinahanglanon nga pag-atiman sa kalikupan.
Matud pa ni Natera nga ang VECO ug ang tanang kompaniya nga gipanag-iya sa Aboitiz maoy mopasiugda sa usa ka oras nga pagpalong sa suga gikan sa alas 8 sa gabii ngadto sa alas 9 sa gabi karong Marso 27.
Gitataw ni Natera nga boluntaryo ang mga tawo nga mosalmot sa maong kalihukan hinungdan nga nanawagan sila sa publiko nga mosalmot sa usa ka oras nga pagpalong sa suga karong Marso 27 sa gabii.
Matud pa ni Natera nga ang katuyoan sa maong kalihukan dili ang pagdaginot sa kuryente kun dili ang pagmugna og awareness sa publiko sa problema sa kalibutan. Apan miasoy si Natera nga niadtong miaging tuig, ang VECO nakatigum og 48 megawatts sa pagpamalong og suga sa kabalayan ug establisamento sa Sugbo bali og usa ka oras atol sa earth hour.
Gipanghinaot niini nga madungagan unya ang mga kompaniya ug mga residente dinhi sa Central Visayas nga mosalmot sa Earth Hour karong tuiga. – BANAT NEWS