CEBU, Philippines - Gipakusgan sa kapolisan sa dakbayan sa Talisay ang pagpangita kang Filbert Mata kinsa nakaikyas dihang gironda sa kapolisan ang hideout niini didto sa Ramona Village, barangay San Isidro, dakbayan sa Talisay, niadtong Huwebes.
Si Superintendent Henry Biñas, hepe sa Talisay City Police Station sa pakighinabi niini sa Banat News kagahapon mibutyag nga dili nila lung-an hangtod nga dili hidakpan si Mata tungod kay daghan pa unyang maamong niini gumikan sa pagkanotado niini isip sakop sa Roy Quimada robbery group.
Kahinumdoman nga sa buy- bust operation nga gilusad sa kapolisan niadtong Huwebes, sila ra si Felixberto Mata, amahan ni Filbert Mata ug Aljun Sanchez maoy nadakpan sa mga sakop sa Investigation and Detective Management Branch sa Cebu City Police Office uban sa kapolisan sa Talisay City Police Station kay si Filbert mikaratil og dagan niadtong tungora.
Gawas sa giingong pagpanulis ang tulo gipasanginlan usab nga nalambigit sa pagpamaligya og ginadiling drugas.
Sayo niini si Felixberto Mata ug Sanchez positibong giila sa saksi nga maoy mitulis sa Jevi Money Changer diha sa Tabunok, ug Victoria’s Halo-halo nga gipanag-iya ni SPO2 Manuel Sarmiento sa mao gihapong barangay sa maong dakbayan.
Uban nga nasakmit sa kapolisan gikan sa mga kamot sa maong mga dinakpang suspetsado mao ang 9mm pistol nga iya ni Sarmiento nga gidala sa maong mga tulisan niadtong pagtulis nila sa tindahan sa maong polis, usa ka .38 kalibreng revolver , usa ka .45 kalibreng pistola, duha ka buhing bala sa M203, tulo ka box nga bala ug duha ka magazine nga iya sa kalibre .45 pistola, usa ka dakong pakete sa shabu , ug usa ka XRM nga motorsiklo. – BANAT NEWS