Villar gihagit ipasaway ang NPA

CEBU, Philippines - Gihagit ni Party-list Representative Risa Hontiveros si Senador Manuel Villar nga ipa-kondina ug ipasaway ang pangilkil nga gihimo sa mga rebelding New People’s Army (NPA) kun tinuod siyang wala mobayad og permit-to-campaign (PTC) ug permit-to-win (PTC) ngadto sa maong grupo.

Gibutyag ni Hontiveros nga ang (PTC) ug (PTW) maoy labing makaguba sa demokrasya sa nasud kay usa kini ka matang sa pangwarta sa mga rebelde diin gihimo nilang gatasan ang mga politiko gustong modaug bisan sa dili patas nga paagi. Apan kay gipasigwar man pag-ayo ni Villar, kandidato sa pagka-presidente sa Nacionalista Party (NP) nga wala gyud siya mobayad og PTC ug PTW ngadto sa mga rebelde, gusto ni Hontiveros nga iya kining pamatud-an pinaagi sa pagsaway ni Villar sa maong matang sa panguwarta ug pangilkil sa maong grupo sa mga komunista sa nasud.

Kay alang kang Hontiveros kun dili mosaway si Villar niini basin makatuo pa ang katawhan nga tinuod gyud nga mibayad siya og PTC ug PTW ngadto sa mga NPA aron lang modaug sa umaabot nga piniliay.   (Lesley Caminade)      (BANATNEWS)