CEBU, Philippines - Upat ka bata ug usa ka hamtong ang namatay human gidaro sa sakyanan ang pundok sa mga tawong nangadyi alang sa usa ka minatay diha sa barangay Foraliza sa lungsod sa Tuburan niadtong Biyernes sa gabii.
Ang biktima nga namatay diha-diha mao si Janine Oros, 10, samtang dead on arrival sa Tuburan District Hospital sila si Janine Tajanlangit, 7, Jessica Sayson, 14, Richard Tapil, 5, ug hamtong nga si Levi Tapil, 34, pulos molupyo sa nahisgutang lugar.
Ang nakadasmag sa mga biktima mao ang Nissan Frontier nga kolor yellow nga gimaneho ni Jun Anthony Cabintoy Sayson, 27, molupyo sa barangay Carmelo ug anak sa kapitan sa barangay Colonia nga si kapitana Alice Cowley.
Matud pa ni Chief Insp. Timmar Alam, hepe sa Tuburan Police dihang nahinabi sa Banat News ang anak sa kapitan paingon sa amihanang bahin apan pag-abot sa maong lugar aksidente kining mibangga sa gi-parking nga motorsiklo daplin sa karsada.
Tungod sa kakusog sa dagan niini nalahos kini pagdaro sa gi-parking usab nga traysikol ug dayon midaro sa mga tawong nagtapok sa usa ka tent nga nagpahigayon sa katapusang pangadyi sa patay.
Matud pa ni Alam, ang mga biktima nagbarog niadtong higayuna nga nanabat sa pangadyi dihang kalit nga gidaro sa maong sakyanan.
Ang mga biktima daling gitabang ug gidala sa tambalanan apan dead on arrival sila si Tajanlangit, Sayson ug Levi. Si Oros namatay samtang gitabang sa mga doktor. Ang batang 5-anyos nga si Tapil gisuwayan pa og dala sa usa ka tambalanan sa dakbayan sa Sugbu apan nakabsan gihapon sa kinabuhi.
Ang suspek human sa hitabo daling misibat apan kagahapon sa alas- 10:15 sa buntag boluntaryo kining mitahan sa iyang kaugalingon ug nagtingkagol na karun sa karsel samtang nagpaabot sa tukmang kaso nga ipasaka batok kaniya.
Atol sa gihimong pagsukit-sukit sa kapulisan gi-angkon sa suspek nga nakainom siya niadtong higayuna apan miinsister nga nawad-an siya og kontrol sa manobela dihang kalit mibuto ang usa sa mga ligid ug wala na mopaak ang brake sa sakyanan. (BANATNEWS)