Tulisan nadakpan gikulata sa estambay

CEBU, Philippines - Usa ka suspetsadong tulisan kinsa misuway og tuok sa babayeng iyang gibiktima nadakpan ug nakulatahan sa mga estambay didto sa Sector 5 sa barangay Basak, dakbayan sa Mandaue sa miaging gabii.

Ang suspetsado mao si Jessie Booc, 29, ulitawo nga taga barangay Yati sa lungsod sa Liloan ug ang gitulis niya mao si Joan Villegas, 30, taga barangay Labogon sa maong dakbayan.

Si PO2 Waldo Batad sa kapolisan sa Presinto 3 sa Basak Police Station nga nahinabi sa Banat News miingon nga nagmaneho ang biktima sa iyang sakyanan apan nabara kini sa maong lugar gumikan sa paghuot sa trapiko.

Wala usab niya hisayri nga wala diay masirad-i niya ang likod nga pultahan sa iyang sakyanan diin didto moagi ang suspetsado hinungdan nga nakasulod kini sa sakyanan.

Sa pagtungtong niini sa likod nga lingkoranan mideklara dayon nga tulis uban sa pagtuok sa liog sa biktima.

Ang nagtapok nga mga estambay sa maong dapit nga nakamatikod sa pagsinggit sa biktima, maoy mibunlot sa pagpagawas sa suspetsado gikan sa sakyanan ug dihang nakagawas na kini, gitabangan nila og kulata.

Si PO2 Batad midugang nga may duha ka kaubang wala hiilhi ang suspetsado kinsa mikaratel og panagan dihang namatikdan nilang gibukbok na sa mga estambay ang suspetsado.

Nagduda si Batad nga ang maong grupo maoy tigpanulis sa maong lugar ug daghan na kining nabiktima busa gidapit nila kadtong mga biktima nga moduaw sa ilang buhatan aron sud-ongon ang dagway niining suspetsado nga nagtingkagol na karon sa ilang prisohan. – BANAT NEWS