Laing Crips boy napatay sa Cogon
CEBU, Philippines - Laing miyembro na usab sa Crips ang nakabsan sa kinabuhi human giulo sa pagpusil sa wala mailhing tawo alas-9 sa miaging gabii sa sitio All Seasons, barangay Cogon Pardo.
Ang namatay nailhan nga si Nestor “Waray” Orion,19, taga sitio Sacred Heart sa nahisgutang lugar samtang ang mamumuno giingong nagsul-ob og itom nga t-shirt, itom nga shorts ug nag-ski mask.
Sumala pa sa imbestigasyon sa Homicide Section ang biktima padulong sa usa ka videoke uban ang mga higala dihang kalit mibabag ang mamumuno ug mipusil kanila.
Tungod niini nag-iyahay og panagan ang grupo sa biktima apan nahagba ang naulahi tungod sa igo sa bala diha sa tuong bahin sa ulo, duha sa likod ug dapidapi.
Dihang milinaw na ang dapit, gibalikan sa mga kauban ang lugar ug mao nalay ilang nakit-an si Orion nga nagbuy-od na ug daghan og sama pinusilan hinungdan nga nanawag sila og tabang.
Nakuha diha sa crime scene ang mga basiyo sa kalibre .45 nga bala nga gituohang maoy gigamit sa mamumuno.
Sa pakighinabi sa Banat News ni PO3 Geoffrey Gutual mibutyag kini nga posibleng sakop sa karibal nga grupong Bloods ang mamumuno ug ilaha karong gisusi kun may koneksyon kini sa nahitabong pagpamusil sa usa ka sakop sa Bloods gang diha sa barangay Tejero niadtong milabay'ng Marso 9 nga miresulta sa kamatayon ni Kenneth Veloso, 18, nga sakop sa Bloods ug napagan si Ana Mary Bokiron,14.
Sa laing bahin, naangol usab ang usa ka Emmanuel Limpangog, 18, nga giingong ig-agaw ni Veloso ang talandugon ang kahimtang human pusila sa ulo sa lalaking nagsul-ob og camouflage diha sa Villagonzalo 2 sa barangay Tejero kagahapon sa kaadlawon.
Si Limpangog gikatahong nagduwa og internet games nianang tungura dihang kalit giduol sa mamumuno ug gipusil kini sa ulo ug daling miikyas padulong sa MJ Cuenco Ave.
Si SPO4 Dennis Moga, imbestigador sa Homicide Section miklaro dayon nga di konektado sa gang war ang pagpusil kang Limpangog tungod kay di sakop sa gang o fraternity ang biktima, gituohang posibleng atraso ang motibo sa krimen. – BANAT NEWS
- Latest
- Trending
