P.5M nga balay naugdaw, ginang naangol usab

CEBU, Philippines - Dul-an sa tunga sa milyon ka pesos ang danyos ug usa ang naangol sa sunog nga miigo sa duha ka mga panimalay sa barangay Don, Gregorio Antigua lungsod sa Borbon niadtong Miyerkules sa ala 1:30 sa hapon.

Ang nasunog nga panimalay gipanag-iya ni Anecito Rediros, nagpuyo sa maong lugar, samtang partially burned ang pinuy-anan ni Marcelito Garcia.

Paso sa duha ka bukton ang naangkon si Antonia Rediros ang asawa ni Anecito ug gidala sa tambalanan.

Matud ni PO1 Aaron Salogaol sa Borbon Police dihang nahinabi sa Banat News base sa report sa kabomberohan miabot og P350 mil ang danyos sa naugdaw nga panimalay ni Rediros ug P15 mil   sa pinuy-anan ni Garcia.

Nasuta sa imbestigasyon nga faulty electrical wiring ang hinungdan sa sunog nga nagsugod sa pinuy-anan sa pamilyang Rediros.

Ang maong sunog gipaubos sa general alarm diin nitabang og respondi ang mga firetrucks gikan sa mga kasikbit nga lungsod sama sa Sogod, Catmon ug siyudad sa Bogo. - Darrel Carumba ug Romeo Limpangog (BANAT NEWS)