CEBU, Philippines - Midemanda og dugang usa ka gatos ka pesos nga usbaw sa suholan matag adlaw ang mga mamumuo dinhi sa Central Visayas apil na dinhi sa Sugbo.
Kini human pormal nga niduso og petisyon kagahapon sa buntag ang partylist representative sa Trade Union Congress of the Philippines kon TUCP nga si kongresista Raymund Mendoza bahin niini dinhi sa rehiyon sa Regional Tripartite Wages and Productivity Board (RTWPB-7) kagahapon sa alas 9:00 sa buntag.
Usa ka gatos ka pesos across the board increase matag adlaw gikan sa minimum nga pletihan ang gipangayong usbaw alang sa mga mamumuo dinhi sa rehiyon.
Si Mendoza mipasabot nga panahon nang mausbawan ang suholan sa mga mamumuo gumikan sa padayong pagsaka sa presyo sa mga nag-unang palaliton.
Gipasabot ni Mendoza nga katapusang usbaw nga napatuman dinhi mao ang P17 niadtong tuig 2008, sa milabay'ng tuig wala sila moduso og petisyon alang sa pagpangayo og usbaw sa suholan tungod kay nakasabot sila sa nasinating kalibutanong krisis sa ekonomiya.
Hinuon gitakdang tukion pa og mopahigayon pa og sectoral consultation ingon man public hearing ang RTWPB sa maong gidusong petisyon alang sa dugang usbaw sa mga mamumuo dinhi sa rehiyon apil na sa Sugbo. (Darrel Carumba)