Tigbuhat puso naghikog

CEBU, Philippines - Inahan nga tigbuhat og puso napalgang nagbitay kilid sa tindahan sa Tabo-an public market sa barangay San Nicolas-Proper kagahapon sa alas 2 sa kaadlawon.

Ang naghikog nailhan nga si Erlinda Garcia Villamor, 56, molupyo sa maong lugar ug negosyante og puso.

Base sa inisyal nga imbestigasyon sa kapolisan nasayran nga si Villamor ug ang iyang bana nga si Bertulfo nagkaaway. Gani, mipatunga sa panag-away ang ilang anak nga si Julieto ug sa kalit lang iyang nasumbagan ang iyang inahan.

Tungod sa gibuhat ni Julieto mipasaka og reklamo si Villamor batok sa iyang anak tungod sa iyang naangkon nga bun-og sa nawong niadtong Pebrero 26 ning tuiga diin ang hearing gitakda niadtong Marso 3.

Sa dihang gipatawag na sila sa adlaw sa husay wala lang damha nga tunga-tunga sa ilang husay wala na mipadayon si Villamor sa wala pa masutang hinungdan. Samtang paingon na nga mogawas si Villamor sa barangay hall maoy nadunggan sa mga anak niini nga babaye nga maghikog siya.

Tuod man kagahapon sa buntag mao nalay nakit-an sa anak nga babaye ni Villamor nga nagbitay na kini kilid sa tindahan nga gipanag-iya sa usa ka Lita Obido.

Sa pakighinabi sa Banat News ni SPO3 Rey Cuyos sa Homicide Section nagduda nga wala na makaagwanta ang inahan sa mga estoryang nadunggan atol sa hearing hinungdan sa paggawas gikan sa barangay hall ug sa paghikog niini. Dugang pa ni Cuyos nga ang problema lang sa pamilya maoy ilang nakita nga hinungdan sa paghikog ni Villamor. – BANAT NEWS