Tomas di na mo-hire og bag-ong Citom Enforcer

CEBU, Philippines - Dili obligado ang syudad sa Sugbo nga mo-hire og mga bag-ong traffic personnel sumala pa ni Cebu City Mayor Tomas Osmeña atol sa pakighinabi sa mga tigbalita kagahapon.

Matud ni Osmeña nga dili na usab kini interesadong mangita pa og mga ipuli sa maong mga gipanaktak nga traffic personnel nga gipasanginlan sa mga drayber nga mangilkilay.

Apan nagkanayon ang mayor nga kun aduna may ipahigayong hiring sa mga bag-ong traffic enforcers ang City Traffic Office Management aron makatabang sa pagbantay sa trapiko sa siyudad dili niya kini supakon.

Ang rason sa mayor nganong dili obligado ang syudad pagkuha og traffic enforcers kini tungod kay ang lokal nga kagamhanan igo rang mi-abag sa nasudnong ahensya sa gobiyerno alang pagpatunhay sa kahapsay ug kalinaw sa dagan sa trapiko.

Apan ang tsirman sa transportation committee sa dakbayan nga si Konsehal Sylvan Jack Jakosalem nagkanayon nga posibleng madugangan pa ang gipangtaktak nga mga enforcers.

Sumala pa sa report sa ABS-CBN News Central Visayas sa interbyu kang Jakosalem nga posibleng duna pay dugang 17 ka mga traffic enforcers ang ilang taktakon, matud pang Jakosalem nga paspas ang proseso sa ilang imbestigasyon.

Kahinumduman nga gipalagpot ni Osmeña sugod niadtong Miyerkules ang 31 ka mga traffic enforcers nga gi-akusahang nangilkil sa mga motorista ilabi na sa mga pasaheroan. - Johanna Natavio (BANAT NEWS)