CEBU, Philippines - Gibana-banang 31 ka mga traffic personnel ang posibleng taktakon gumikan sa mga reklamong pagpangilkil nga gipasaka sa mga drayber diha sa Cebu City Traffic Operations Management (CITOM).
Si CITOM Executive Officer Arnel Tancinco nagkanayon nga nagpadayon ang imbestigasyon kalabot niini samtang ang Human Resource Development Office sa syudad misusi na sa tukmang silot batok kanila kun mapamatud-ang sad-an. Nasuta nga adunay 48 ka mga traffic personnel ang gi-akusahan sa Nagkahiusang Driver sa Sugbo kon NADSU nga nangilkil, apan 31 ra niini ang giingong taktakon base sa gibug-aton sa mga ebidensyang nakuha. Kahinumduman niadtong miaging semana, mituyo sa pag-adto sa Cebu City hall ang pangulo sa NADSU nga si Ruben Rama aron nga iyagyag ang maong problema sa mga sakop sa konseho.
Gibulgar ni Rama ang mga reklamo sa iyang mga miyembro kalabot sa pagpangilkil sa mga CITOM personnel nga diin ang mga dispatser maoy gihimong kolektor sa maong mga traffic enforcers. Kini bisan og adunay gipatuman nga “anti-dispatching ordinance” ang kagamhanang lokal sa dakbayan sa Sugbo.
Giingong ang maong mga dispatser nga gipaluyohan sa mga traffic personnel nga mangolekta og 20 pesos matag drayber sa matag biyahe matag gabii ug kadtong mobayad ‘exempted’ sa mga traffic rules nga gipatuman.
Nasayran nga kasagaran sa mga dispatser ang anaa mag-operate diha sa dalan Osmeña Boulevard ilabi na diha dapit sa usa ka dako’ng mall sa Fuente Osmeña, ingon man atubangan sa Metro Bank, gawas nga bahin sa Development Bank of the Philippines ug sa dalan Colon.
Gibutyag usab sa NADSU nga dugay nang nangilkil kanila ang maong mga sakop sa CITOM apan ning higayona nakahukom ang mga drayber nga moreklamo kalabot niini tungod kay kuwang man gani ang ilang kita og samot nga misaka pa usab ang mga presyo sa palaliton.
“Nagbutang na sila og lata diha sa may dapit sa DOH Regional Field Office aron hulog-hulogan og 15 pesos aron dili sila dakpon,” matud pa ni Rama.
Sa iyang bahin, si Konsehal Sylvan ‘Jack’ Jakosalem nga maoy chairman sa committee on transportation and communications nagkanayon nga ang konseho mopahigayon og dugang imbestigasyon kalabot na sa mga badlungong mga traffic enforcers.
Apan si Tancinco sa iyang habig nagkanayon nga ila pang tun-an ang posibilidad nga pagtangtang sa maong mga traffic enforcers ilabi na nga nagkaduol na ang election ban.
Samtang si Cebu City Mayor Tomas Osmeña ang nagdumili una sa paghatag og komentaryo kalabot na sa maong isyu hangtud nga mapagawas na ang resulta sa imbestigasyon. (Johanna Natavio) (BANATNEWS)