CEBU, Philippines - Gumikan sa epekto sa El Niño, milihok kagahapon ang mga kapariang Katoliko aron iampo nga mahunong na kining maong katalagman nga nakadaot na sa mga tanom sa kaumahan sa nasud.
Sa taho sa GMA News nasayran nga nagdungan ang mga kaparian sa Basilan ug Cebu sa ilang pagpalanog sa gitawag nilang Oratio Emperata (OE), ang epektibo kaayong pag-ampo sama sa gibuhat ni Arsobispo Gaudencio Cardinal Rosales sa Manila sa pagsanta sa HlNl virus kaniadto.
Matud pa ni Obispo Martin Jumoad sa Basilan nga sugod kagahapon ang tanang simbahan sa lalawigan sa Basilan may kopya na sa OE nga maoy ipangadye sa tanang simbahan buwahan to molurang kining El Niño nga milukop na karon sa tibuok nasud.
Sa Sugbo nakigtagbo na si Cardinal Ricardo Vidal sa mga kadagkuan sa Department of Agriculture aron sa pagsuta sa mga panukdanang gisagop sa kagamhanan aron nga masagang ang epekto niining dakong huwaw karon.
Sagupon usab sa taga Sugbo ang OE nga gipatuman sa Basilan sa paningkamot nga mokalma kining hilabihang kainit sa panahon.
Nasayran gikan kang Undersecretary Joel Rudinas sa Agrikultura nga mikabat na og P3.7 bilyones ang kadaot sa mga tanom sa kaumahan sa tibuok nasud base sa record kutob niadtong Pebrero 17 apan gituohang mosaka pa kini ngadto sa P7 bilyones.
Kasagarang naapiktahan pag-ayo sa huwaw mao ang kahumayan, kamaisan, mga high value commercial crops sa 22 ka lalawigan sa nasud. - Lesley Caminade (BANAT NEWS)