'Secret deal' ni Garcia ug Villar gihimakak

CEBU, Philippines - Ang One Cebu Party nga gipangulohan ni Gov. Gwen Garcia kusganong mihimakak sa nanggawas nga hugon-hugon nga ang ilang kampo may ‘secret deal’ sa kampo ni Nationalista Party presidential candidate Senador Manny Villar.

 Si Capitol consultant on Information Atty. Rory Jon Sepulveda nagkanayon nga ang gobernadora ug ang kinatibuk-ang One Cebu Party naghiusa sa pagsuporta sa kandidatura ni Lakas-Kampi-CMD standard bearer kanhi Defense Secretary Gilbert Teodoro.

 Matud pa ni Sepulveda nga walay kamatuoran ug basehanan ang maong report ug kutob lamang kini sa huhungihong.

Ang partido sa gobernadora gihulagway ni Sepulveda nga ‘one million percent’ nga mosuporta ni Teodoro kay giisip nila kining labing haom, competent nga kandidato sa pagka-presidente.

 Gipahibawo usab niining kamatuuran niini mao ang nagkadaghang mga grupo sa mga professional nga miduol sa ilang partido aron mahimong volunteers sa One Cebu ug sa kandidatura ni Teodoro ug dili lamang mga botante.

 Dugang pahibawo ni Sepulveda nga sa higayon nga makompleto na ang ilang pagtukod og mga headquarters sa matag barangay sa probinsiya sa Sugbu, makasiguro silang modaug dinhi sa Sugbu si Teodoro.

 Kagahapong adlawa sa pagbisita ni Villar, ang senador wala usab mokumpirmar nga may secret deal sila ni Gov. Gwendolyn Garcia.

 Apan si Villar mipasumbingay nga mas maayong panid-an na lamang unya sa umaabot nga mga adlaw kun si kinsa ang iyang makuyog dinhi sa Sugbu. (Chester Abadilla)    (BANATNEWS)