Pagpasuspenso sa klase tungod sa public hearing gisusi

CEBU, Philippines - Ipasusi sa Department of Education (DepEd-7) ang pagpasuspenso sa klase sa Tuburan National High School ug Putat National High School sa lungsod sa Tuburan tungod lamang sa pagpatambong sa mga tinun-an ug magtutudlo sa gipahigayong public hearing nga gitumong paghatag og katungod ni Mayor Constancio Suezo pag-apply og loan nga P110 million alang sa pagpalambo sa water project sa lungsod niadtong Lunes. Gibutyag ni DepEd-7 director Recarido Borgonia sa DyDD nga walay katungod ang school head o principal sa tunghaan pagsuspenso sa klase kun walay pagtugot gikan sa division superintendent ug sa ilang rehiyonal nga buhatan.

Gipasabot ni Borgonia nga mahimo lang makakanselar og klase ang mga prinsipal o school heads kun dunay mga katalagman nga magbutang sa peligro sa mga tinun-an.

Nasayran gikan ni Konsehal Cecindo Potencioso dihang na-interbyu sa samang radio station nga gipakanselar ang klase sa udto sa nahisgutang mga tunghaan kay gipatambong sa public hearing ang mga tinun-an ug magtutudlo.

Nasayran usab nga giingong nagkaguliyang ang public hearing human sa gibanabanang sobra sa dos mil ka mga mitambong, katunga niini ang misupak sa maong loan application.

Tungod sa kabalakang mag-antos sila unya kun mahal ang presyo sa tubig sa ilang lungsod, kadtong supak nagsuot og ribbon nga kolor yellow samtang ang pabor nagsul-ob og ribbon nga kolor green. Giingong nagkatinubagay usab sila si Mayor Suezo ug Konsehal Marie Tabotabo human pasanginli sa naulahi ang mayor nga gisekreto ang pagpasar sa resolusyon niini sa konseho nga nagtugot sa mayor nga maka-apply sa loan sa Local Water Authorities Administration (LWAA) nga giatol usab kini nga naghinangat na ang piniliay. (BANATNEWS)