CEBU, Philippines - Mga responsable sa pagpatay sa magtutudlo nga si Romeo Duran sa Binlod Elementary School sa lungsod sa Argao giingong mga gun-for-hires nga modawat og baratong bayad sumala pa sa kapolisan.
Sumala pa ni Sr. Supt. Erson Digal, ang director sa kapulisan sa lalawigan sa Sugbu nga niadtong milabay'ng kaadlawon gisuwayan unta nila og sikop ang grupo sa ilang gitagoan sa usa sa mga lungsod sa habagatang bahin sa lalawigan.
Apan nakabantay ang grupo ug mipaulan og bala sa kapolisan, gikatahong ang nakaengkwentro sa mga polis maoy gitumbok nga gunmen sa maestro, gikatahong upat ka tawo ang ilang gidudahang mihimo sa krimen.
Matud pa ni Digal nga nakalighot ang mga gikatahapan ug wala sila'y nadakpan sukwahi sa unang migawas nga report nga dunay usa nga nasikop ug usa ang nakaikyas.Wala hinuoy nasamdan sa habig sa awtoridad.
Ang operasyon natigayon human makadawat og impormasyon sa ilang mga informers nga diha sa maong lugar magtago ang mga gunmen sa maestro.
Gibutyag niining ang upat mga gun-fire-hire diha sa lugar sa habagatang bahin sa lalawigan sa Sugbu nga maoy ‘mitrabaho’ sa maestro modawat lang og baratong bayad. Dugang niini nga ang upat nga ilang nakaengkwentro nailhan na ug positibong gitumbok sa mga testigos sa pagpatay kang Duran diha sulod sa lawak saringan niini.
Kagahapon gi-presentar usab ni Digal diha sa iyang buhatan ang cartographic sketches sa duha, ang gunman nagsul-ob og kawo nagpangidaron og 29 ngadto sa 30 anyos; 5’4 ang gitas-on, tambukon ug kasarangan ang pamanit ug bugason ang nawong.
Samtang ang lookout nagkawo, naka-sunglasses, 30 ngadto sa 40 anyos, 5’7 ang gitas-on ug kasarangan ang panglawas.
Matud pa niini nga ang gunman nakig-estorya pa sa ilang testigos sa wala pa niini sudla ang classroom ni Duran, samtang ang lookout nailhan usab sa ilang mga testigos.
Ang kapolisan nakig-coordinate na sa mga kadagkuan sa Cebu Provincial Detention and Rehabilitation Center ug Cebu City Jail aron subayon ang record sa upat sanglit giingong mga ex-convicts kini.
Matud pang Digal nga 75 porsiyento nang sulbad ang maong krimen base sa nakuhang mga ebidensya, testimonya ug ang positibong pag-ila sa mga gunmen sa ilang mga testigos.
Giangkon hinuon ni Digal nga di pa nila mapasaka ang kaso sanglit nagpadayon pa ang hot-pursuit operations.