CEBU, Philippines - Ang Cebu City Government moapil og hatag og college scholarship sa tanang mogradwar sa high school karung umaabot Marso sa lungsod sa Cordova sumala pa ni Mayor Tomas Osmeña.
Kini isip iyang tabang sa tanang estudyanteng taga Cordova nga mangandoy nga maka-eskwela sa kolehiyo, buot niyang hatagan sila og tag singko mil nga scholarship grant.
Dugang pa niini nga base sa ilang estimate adunay usa ka libong estudyante sa high school ang makapahimulos sa maong scholarship nga iyang gitanyag.
Mipasabot usab si Osmeña nga ang Cordova maoy iyang gihatagan sa maong scholarship kini tungod sa “Big Brother Program.”
Gawas sa mga estudyante hatagan usab sa dakbayan ang mga senior citizen sa nahisgutang lungsod og tag P2 mil matag usa nga rehistrado sa maong lungsod. Ang maong tanyag iapod-apod sa mayor sa dili pa ang election period.
Samtang si Osmeña mipadayag nga anaa na sa mopuli sa iyang pwesto kun sundon ang iyang mga gipangbuhat karun. “It is up to the next mayor to do it also,” matud pa niini.
Planong imbitahon sa mayor si Cebu Gov. Gwendolyn Garcia atol sa pagpanghatag niya sa maong scholarship grant. - Lesley Caminade (BANAT NEWS)