CEBU, Philippines - Usa ka gidudahang tulisan namaak sa polis nga migukod ug misikop kaniya niadtong Martes sa gabii sa barangay Tabunok, dakbayan sa Talisay.
Ang nanigbas ug namaak sa polis mao si Alex Ursal, 31, taga Medellin apan temporaryong nagpuyo diha sa Carcar. Nakaangkon kini og tulo ka samad pinusilan sa tuong paa ug nalandig sa Vicente Sotto Memorial Medical Center.
Si Ursal giingong nanulis sa usa ka Nestor Carlos, 38, taga San Isidro, Talisay ug drayber sa habal-habal. Nakaangkon kini og samad tinigbasan sa iyang tangkugo ug dinunggaban sa tuong nawong.
Si Carlos nag-atang og pasahero sa dihang giduol ni Ursal ug mideklarar og “tulis” hinungdan nga gihatagan si Ursal og P100. Sa dihang milakaw na unta si Ursal, gigukod kini ni Carlos ug miaksiyon og bawi sa iyang kuwarta hinungdan nga natigbasan kini.
Si PO3 Mikie Espina ug PO2 Stephen Sefuesca sa Intelligence Operatives sa Talisay City Police Station nag-roving sa lugar. Nadunggan si Carlos nga misinggit og pakitabang.
Sa dihang miduol ang duha ka polis, si Ursal daling misakay sa Honda Wave nga motorsiklo kolor itom nga nagtangag sa plakang 7D-4477-ND nga gi-carnap ni Ursal gikan sa Carcar.
Si Ursal mipadagan sa motorsiklo paingon sa dakbayan sa Sugbo hinungdan nga gigukod kini nilang PO3 Espina ug pag-abot sa dalan Sangi, barangay Tabunok tayming nga stop ang signal sa traffic light ug nababagan si Ursal. Si PO3 Espina ug PO2 Sefuesca mipaila kang Ursal nga mga polis ug gimanduan nga pasurenderon apan nasuko ang suspetsado ug nanaog sa gisakyang motor dayon lanit sa sanggot ug kutsilyo nga giluklok sa hawak ug miatake sa mga polis.
Si PO2 Sefuesca daling milayat sa motorsiklo ug si PO3 Espina usab gibuhian niini ang manobela sa iyang motor ug milayat aron makalikay sa pagtigbas ni Ursal.
Matud ni PO3 Espina nga hilabihan nilang likay-likay ni PO2 Sefuesca nga dili maigo sa sanggot ug kutsilyo apan nadugay naapikihan sila hinungdan nga iyang gipusil si Ursal sa paa ug nabuhian ang kutsilyo.
Ang mga polis nagtuo nga na-neutralize na si Ursal apan miatake gihapon kini ngadto kanila ug nanigbas sa sanggot ug nakaw-itan gyud sa sanggot ang walang paa ni PO2 Sefuesca ug ang karsones niini natabas ug napormang sayal. Nasamdan pa kini og gamay sa paa.
Giusban og pusil ang paa ni Ursal hinungdan nga mikamang kini sa karsada. Ang mga polis nagtuo nga na-neutralize na si Ursal, apan mipaduol kini kang PO2 Sefuesca ug gi-okuban sa pagpaak ang walang tiil sa polis ug deriyot kini maukab.
Si Ursal nahibaw-an nga wala mopatuo sa checkpoint nila ni Sr. Insp. Isagani Abalo sa sitio Mananga ug milahos ilawom sa flyover.
SPO1 Joel Pananganan, duty desk officer kagahapon sa Carcar City Police Station sa pakighinabi niini sa Banat News nagkanayon nga mga alas 8 niadtong Martes sa gabii si Ursal nanigbas og sanggot sa mga silingan niining si Volter Sasutil 21, tag-iya sa motorsiklong iyang gidagit ug sa 13-anyos nga si Rey Jovan Lorje. – BANAT NEWS