CEBU, Philippines - Usa ka mahuyang nga maestro sa elementarya gipusil-patay samtang nagpahigayon og eksaminasyon sa iyang mga tinun-an sa Grade 6 sulod sa classroom sa Binlod Elementary School sa lungsod sa Argao kagahapon sa alas 3 sa hapon.
Si Romeo Duran, 53, lumad nga taga Ilo-Ilo ug kasamtangang nagpuyo sa barangay Binlod, Argao, patay diha-diha sa dihang gipusil atubangan sa iyang mga tinun-an. Ang mamumuno giingong nagpurong ug nagkalo nga giubanan sa tulo ka lalaki nga nagsakay og motor nga walay kukahadlok nga misulod sa tunghaan.
Si Ginang Engracia Alcain, OIC principal sa Binlod Elementary School nga nahinabi sa Banat News nagkanayon nga samtang nagpahigayon og pasulit si Duran, misulod sa classroom ang mamumuno ug nangayo og katahuran, “good afternoon, sir.”
Apan sa dihang milingi si Duran, kalit kining gipusil sa mamumuno. Maayong pagkaigo sa ulo ni Duran nga miresulta sa hinanaling kamatayon niini.
Dugang pa ni Alcain nga adunay nakakita sa mamumuno tungod kay aduna kini kuyog nga tulo kabuok lalaki nga nagsakay og motor nga napaabot sa ubos nga bahin sa tunghaan.
Si Alcain nagduda nga utang ang hinungdan nganong gipatay si Duran. Gitataw hinuon ni Alcaon nga dili hinuon siya makaseguro kun mao ba gyud kini ang hinungdan.
Gibutyag hinuon ni Alcain nga si Duran kanunay’ng mo-estorya kaniya kabahin sa away sa iyang pamilya.
Gihulagway ni Alcain nga grabe ang kahadlok nga gibati sa kabataan nga giklasehan sa biktima hinungdan nga iya na lang kining gipapauli.
Sa laing bahin, si Rufino Gacis nga kanhi supervisor sa Argao II District nagkanayon nga adunay higayon nga iyang gipatawag si Duran tungod sa reklamo nga naabot sa iyang buhatan kabahin sa kadako sa utang niini.
Nagduda usab si Gacis nga tungod sa utang ang rason nga gipusil ang biktima apan magpaabot lang sila kun unsa ang resulta sa ipahigayon nga imbestigasyon sa kapolisan.
Apan si PO1 Eduardo Semilla nga nahinabi sa Banat News nagkanayon nga walay kalambigitan sa utang ang hinungdan sa pagkamatay sa biktima tungod kay base sa mga impormasyon nga ilang nakuha nga nagka-away-away kini sa iyang pamilya.
Nagtuo si PO1 Semilla nga sakop sa pamilya ang miuany pagpapaty ni Duran, apan ila kining imbestigahon.
Si PO1 Semilla miingon nga ang mga tinun-an mihulagway rebolber ang gigamit sa mamumuno pagpatay kang Duran. – BANAT NEWS