Hepe sa Mingla di ikabalhin - Buac

CEBU, Philippines - Ang hepe sa kapolisan sa lungsod sa Minglanilla dili pa mahimong mabalhin sa laing lugar bisan kun may mando na gikan sa labaw nga opisyal sa Cebu Provincial Police Office (CPPO).

Mao kini gibutyag ni Regional Director Rene Ray Buac sa Commission on Elections (COMELEC) 7 kinsa nagkanayon nga nahilakip na sa election ban ang kamanduan sa pagbalhin ni Inspector Leoncio Baliguat, ang hepe sa Minglanilla Police Station.

Midugang si Buac nga wala pa siya'y nadawat nga hangyo gikan sa CPPO sa lakang nilang balhinon si Baliguat sa laing puwesto.

Kini tungod kay base sa balaod kinahanglang may pagtugot sa Comelec ang unsa mang binalhinay og puwesto sa tanang kawani sa gobyerno nga naglakip sa kapolisan niining panahon nga nagsingabot na ang piniliay sa Mayo.

Sayo niini gusto si CPPO Director Erson Digal nga ibalhin si Baliguat ngadto sa Provincial Security and Service Group (PSSG) ug ang ihulip kaniya nga hepe sa police station sa Minglanilla mao si Chief Inspector Jovito Canlapan, ang kasamtangang hepe sa kapolisan sa lungsod sa San Fernando.

Nakuwestionable ang kahimtang ni Baliguat dihang nabara sa trapiko sa Minglanilla ang convoy ni Presidente Gloria Macapagal Arroyo niadtong Enero 24, 2010, samtang nagpaingon kini sa Argao sa pagtambong sa lubong ni kanhi Press Secretary Cerge Remonde.

Busa nangandam na si Digal og suwat hangyo ngadto sa Comelec kalabot sa pagpabalhin niya kang Baliguat.

Apan sa pagkakaron gipaabot pa kini sa Comelec, matud pa ni Buac. – BANAT NEWS