CEBU, Philippines - Usa ka wala mailhing babaye ang napalgang patay nga nabulit og 10 ka mga samad dinunggaban diha sa kalibunan sa sitio Tabok Sapa, barangay Camp 3, dakbayan sa Talisay.
Si PO3 Mikie Espina ug PO2 Stephen Sefuesca sa Talisay City Police Station mibutyag sa Banat News kagahapon nga nakadawat sila og tawag gikan sa Patrol 117 kabahin sa nahisgutang patay'ng lawas.
Matud ni Espina nga ang maong babaye nagsul-ob og compact short pants ug spaghetti strap nga blouse nga kolor puti apan wala'y identification cards o ubang ilhanan nga nakit-an sa iyang posesyon.
Ang maong babaye gihulagway ni PO3 Espina nga gamayon panglawas, dunay gitas-ong 5’0, itumon ang pamanit ug gibana-banang nagpangidaron gikan sa 17 ngadto sa 20-anyos.
Sa paghiling sa patay'ng lawas niini duna kini siyam ka samad dinunggaban sa buko-buko ug usa sa walang bahin nga lusong-lusong nga maoy gituohan sa iyang kamatayon.
Gihulagway usab ni Espina nga dili na maila ang nawong sa maong babaye tungod kay na-deformed na kini ug ilang gituohan nga naungad diha sa yuta ang nawong niini.
Ang nahisgutang patay'ng babaye gidala ngadto sa Talisay City District Hospital apan matud pa sa doktor nga mihiling sa biktima gibana-banang nakabsan kini sa kinabuhi sulod sa duha ngadto sa tulo na ka oras.
Ang mga polis wala'y nakitang bun-og o mga marka sa lawas sa maong babaye gawas sa dinunggaban ug kadaot sa nawong niini.
Ang mga residente diha sa lugar lakip na ang kapitan wala makaila sa biktima.
Matud usab ni Espina nga sa milabay'ng gabii dunay gipahigayong disko diha sa lugar ug ilang gituohang taga laing dapit ang biktima ug mianha lang aron mo-disko.
Gituohan usab sa mga polis nga ang biktima dunay kuyog nga mitabok diha sa sapa maong naabot ngadto sa kalibunan diin siya gipatay.
Ang patay'ng lawas naa karon sa St. Francis Funeral Homes sa barangay Bulacao Talisay alang sa autopsy aron masuta usab kung wala ba kini among-amongi, bisan og ang mga polis wala'y nakitang timailhan nga kini gilugos tungod kay wala man maabli o mahubo ang short pants sa maong babaye.
Si PO3 Espina midugang nga palawman nila ang ilang gipahigayong follow-up nga imbestigasyon sa hitabo. – BANAT NEWS