CEBU, Philippines - Dul-an 70 mil ang nakuha gikan sa lima ka pasaherong sakay sa pasaheroan sa miaging gabii sa dalan Benedicto sa barangay Tejero human kini tulisa sa duha ka tulisan.
Ang mga nabiktima nailhan nga sila Engr. Donna Abigail Alcomendras, 24; Karen Isabel Liao, 22; Joy Dumayac, 20; Judith Andoy, 33; Edzele Marie Andalahao, 22. Gihulagway sa mga biktima ang usa ka kawatan nga nagsuot og maong nga shorts, ug itom nga sleeveless ug gibana-banang 20-anyos ug diha milingkod samtang ang kauban niini mikapyot.
Ang mga biktima sakay sa nahisgutang pasaheroan gikan sa North Reclamation Area ug pag-abot sa karaang White Gold sa barangay Carreta nanakay ang mga tulisan.
Matud pa sa mga biktima ang tulisan sa luyo mikapyot lang ug pipila ka metros palang ang gidagan sa pasaheroan kalit kining mideklarar og tulis dungan sa pagtion og pusil.
Samtang ang kauban niining mikapyot maoy mikuha sa mga butang sa mga biktima nga gilangkuban og Laptop nga Toshiba ni Licayan, N6120 nga nagkantidad og 12 mil, hard disk ug pipila ka mga ATM cards.
Samtang nakuha usab gikan ni Liao mao ang cash nga P800, gold necklace; nakuha usab gikan ni Makiling mao ang cellphone, P2,500 mil nga cash, shoulder bag ni Garcitos nga gisudlan sa deed of sale sa ilang balay samtang walay nakuha gikan kang Andalahao kinsa daling miluklok sa iyang mga butang.
Human himulbuli ang mga biktima daling nanganaog pag-abot diha sa may Villagonzalo 2 ang duha, samtang nagpahatud nalang sa Theft and Robbery Section luwan sa Mobile Patrol Group, wala pa mailhi si kinsa ang duha.
Ang maong dapit maoy usa sa daghang mga insidente sa pagpanulis gumikan sa walay klarong suga ang lugar ug walay magbalantay nga moposte.
Si Kapitan Jessielou Cadungog sa gipadalang text message sa Banat News mibutyag nga duna na silay suspek sa maong hitabo nga taga sitio Tabay sa barangay Carreta. (Lesley Caminade) (BANATNEWS)