Kanhi sakop sa gang napagan, namatay

CEBU, Philippines - Patay nang naabot sa tambalanan ang usa ka miyembro sa Crips gang human kini giingong gipusil sa sakop sa karibal nga Bloods gang alas-11 sa miaging gabii sa South Road sa Poblacion sa barangay Pardo.

Ang namatay nailhan nga si Bayani “Brian” Azur Navarro, 18, molupyo sa Kinasang-an barangay Pardo ug giingong miyembro sa Crips samtang ang gitumbok nga responsable mao ang 16-anyos nga molupyo sa sitio Tayud, Tagunol, Pardo kansang pangalan gipugngan sa Banat News.

Sa pakighinabi sa Banat News sa nakasaksing mga minor de edad nga gikan sila sa biktima sa Bulacao ug pag-abot sa nahisgutang dapit nakit-an nila ang suspek ug ang usa ka wala mailhing lalaki nga nagbarog sa atbang sa ilang gikanaogan.

Sa ilang paglabang nabiyaan nila ang usa nila ka kauban maong ilaha kining gibalikan apan diha-diha gipusil sila sa suspek hinungdan sa pagkatibulaag nila og panagan.

Butyag pa sa usa sa mga testigo sa Banat News nga sa wala pa naabot ang biktima gipangutana siya sa suspek og “Crips mo?” dayon mideretso kini og bunot sa armas dayong pusil sa biktima nga mao pay pag-abot gamit ang kalibre .38 rebolber.

Ang amahan sa biktima nga nakahinabi sa Banat News nga si Ronald miangkon kining sakop kaniadto sa Crips gang ang anak apan mibiya na kini sa grupo human maka-eskwela.

Apan sa pakighinabi sa Banat News sa suspetsado kini mitug-an nga makapila na kining gikulata sa usa sa mga kauban sa biktima nga mao unta’y iyang pusilon apan napagan hinuon ang biktima.

Ang suspek nasikop sa mga sakop sa Pardo police station. (Lesley Caminade)    (BANATNEWS)