Call Center agents ipa- drug test

CEBU, Philippines - Gumikan sa report nga daghang mga call center agents ang nagumon ug tiggamitan sa illegal nga drugas, isugyot ni Dangerous Drug Board undersecretary Atty. Clarence Paul Oaminal ngadto sa Department of Labor and Employment (DOLE) nga mopahigayon og random drug test sa tanang mga call center agents dinhi sa nasud.

 Si Oaminal nagkanayon nga iyang suwatan ang mga kadagkuan sa DOLE labot niini sa ingon ang ilang mga regional nga buhatan sa DOLE manduan nga ipatuman ang Drugs Free Work Place Program sa mga call centers.

Matud pa ni Oaminal nga ubos sa RA.9165 article 7 ang DOLE maoy gitahasan nga maoy mopahigayon sa maong random drug testing sa mga call center agents apan hangtud karon wala pa gyud kini mapatuman. Gibutyag niini nga base sa pagtuon nga gihimo sa mga doktor sa University of the Philippines gikatahong sagad sa mga call center agents tiggamitan og marijuana, ingon man shabu.

 Si Oaminal dihang gihinabi sa Banat News mipadayag nga wala gyud makahuygo ang kampanya batok sa illegal drugs tungod usab sa pipila ka mga ahensya sa gobiyerno (ning tungura ang DOLE) nga wala gyud hugot nga miimplimentar sa mga probisyon sa RA 9165.

“The irony here is, mo-demand ta sa private sector for aggressive campaign against illegal drugs pero kita mismo sa gobiyerno wala gyud fully mi-impliment sa mga provisions sa RA 9165,” pasabot pang Oaminal.(Guam Logroño ug Edwin Ian Melecio)(BANATNEWS)