Baliguat miduaw sa iyang labaw

CEBU, Philippines - Hepe sa Minglanilla Police Station nga si Insp. Leoncio Baliguat Jr. personal nga miduaw sa ilang labaw sa Cebu Provincial Police Office nga si Sr. Supt. Erson Digal aron mopasabot labot sa kapakyas pag-secure sa kadalanan sa lungsod sa dihang miagi ang convoy ni Presidente Gloria Arroyo paingon maglubong kang anhing Press Sec. Cerge Remonde.

Si Baliguat nga miatubang sa mga sakop sa media nagkanayon nga nagtuo gyud siya nga adunay mga polis nga didto sa south highway samtang didto siya sa hospital nga nagbantay sa iyang asawa nga nanganak.

Matud pa niini nga iyang gitahasan ang iyang deputy nga si SPO4 Romeo Elacion pag-deploy sa 12 ka mga polis ngadto sa south highway ug maayo usab ang feedback niini ngadto kaniya.

Si Baliguat nagkanayon nga nakadawat usab siya og text gikan sa iyang mga sakop nga si Supt. Eduardo Saavedra maoy mihatag og briefing sa wala pa sila gi-deploy.

Wala na hinuon mohatag pa og dugang komentaryo si Baliguat sa taho nga si Police Regional Office (PRO-7) director Supt. Lani-O Nerez nasuko kaniya tungod sa kapakyas paghawan sa trapiko sa south highway sa Minglanilla sa dihang nahiagi ang convoy ni Arroyo.

Matud niya nga andam siyang modawat sa bisan unsang silot nga ipahamtang sa ilang labaw.

 Samtang si Digal sa iyang bahin nagkanayon nga dili igo nga rason ni Baliguat nga nanganak ang iyang asawa sanglit kun mamatud-an sa imbestigasyon kasong serious neglect of duty ang iyang atubangon.

Gipasabot niini nga maigo kini sa doktrina sa command responsibility nga kun adunay palpak ang iyang mga sakop, manubag gayud siya niini.

Giklaro ni Digal nga iyang ibalhin si Baliguat sa laing lungsod sa lalawigan sa Sugbo ug ang rekomendasyon iya pa kining iduso sa PRO-7, apan ipananghid pa sa Comelec. – BANAT NEWS