Field test sa Comelec ok kaayo

CEBU, Philippines - Nagmalampuson ang field test sa COMELEC provincial office kagahapong adlawa, ilabi na ang pag-transmit sa mga balota gikan sa dakbayan sa Naga paingon sa Capitol Social Hall ug ngadto sa Comelec-Manila.

Nangulo sa gipahigayong field test si Provincial Election Supervisor Lionel Marco Castillano uban ang mga representante sa Smartmatic-TIM, Cebu Provincial Police Office director Erson Digal ug mga opisyal sa AFP Central Command.

Si Castillano miingon nga ang maong kalihukan gitumong aron masulayan ang mga makina nga gipang-apud-apod ngadto sa kalungsoran pag-transmit gikan sa mga voting precinct sa matag barangay.

Matud pa ni Castillano nga sulod lamang sa pipila ka minutos na-transmit ang mga resulta sa botasyon gikan sa mga counting machines sa dakbayan sa Naga paingon sa Social Hall sa Kapitolyo.

Gipahibalo niini nga ang field test gipahigayon usab sa ubang probinsiya sa nasud ug ang Comelec national office mipahibalo nga ang Cebu maoy labing unang naka-transmit ngadto sa Manila.

Mitumbok kini nga nagkaproblema sila og gamay sa barangay Alpako ug Bairan sa Naga tungod kay walay signal apan gigamitan ra kini sa Smartmatic og satellite phone hinungdan nga na-transmit dayon ang resulta.

Gipahibalo usab ni Castillano nga sa Pebrero 6 mopahigayon og laing field test sa siyudad sa Sugbo, partikular sa barangay Bulacao nga usa ka urban barangay ug sa barangay Mabini sa bukirang barangay. – BANAT NEWS