CEBU, Philippines - Gihangop ni Acting Mayor Michael Rama ang pagtakda na sa plebisito alang sa hingpit nang paghimong usa ka barangay sa sitio Banawa ug Englis ug pagbuwag niini gikan sa barangay Guadalupe.
Una nang gipahibawo ni Kongresista Antonio Cuenco nga ang Comelec mitakda na sa plebisito karong umaabot Pebrero 28 apan gipaabot pa sa kongresista ang gahin alang niini tungod kay giingong wala pay pundo ang Comelec alang sa nahisgutang katuyoan.
Gipadayag ni Rama nga kini angayang pangitaan og solusyon ni Cuenco aron mahatagan na og kinutuban ang planong pagbahin sa Guadalupe.
Dili pabor ang acting mayor nga mauswag ang gitakdang plebisito tungod lang sa kakuwang og pundo nga magamit alang niini.
“I am not for postponement, I am to have that pursued, I am pretty sure Tony will find a way to do that, let them first exhaust,” sumala ni Rama.
Gibutyag hinuon ni Cuenco nga siya gipasaligan na sa Malakanyang pagpagawas og pundo alang sa gitakdang plebisito karong sunod buwan.
Ang Comelec gikatahong nanginahanglan og P1.5 milyones pagpahigayon sa plebisito diha sa nahisgutang barangay.
Gipahibawo ni Cuenco nga iyang i-follow up karong semanaha ang gipasalig kaniya sa Malakanyang nga pundo alang sa maong katuyoan.
Miingon ang kongresista nga kung modaog ang ‘yes vote’ sa plebisito, mahimo nga ipahigayon gilayon ang eleksyon alang sa bag-ong mga barangay officials.
Apan mas pabor si Cuenco nga idungan na lang ang pagpili og bag-ong mga opisyal sa Banawa ug Englis atol sa barangay elections karong buwan sa Oktubre.
Nasayran hinuon nga supak ang mga opisyal sa barangay Guadalupe sa pagbuak sa ilang barangay basi usab sa naaprubahan niining resolusyon. (BANATNEWS)