Pinansiyal ug dili pag-junk sa BOPK ang rason ni Councilor Jagmoc

CEBU, Philippines -  Gibuak na ni Cebu City Councilor Edwin Jagmoc ang iyang pagpakahilom sa Media labot sa hinungdan sa iyang pagpahuway sa politika.

Ang konsehal nga mihukom nang mobalik sa pribadong kinabuhi, naa pa untay usa ka termino ug mahimo pang subli nga magpapili sa katungdanan.Gipadayag ni Jagmoc nga ubay-ubay ang rason sa iyang pagpahuway sa politika ug nag-una niini mao ang iyang kawad-on sa pinansyal nga aspeto.

Apan gitataw sa konsehal nga wala malakip niini ang kontrobersiya nga gilambigit kaniya sa tunga-tungang bahin niadtong miaging tuig.

Si Jagmoc gikatahong nakigrelasyon sa usa ka sakop sa Mayor’s Management Team (MMT) nga hugot usab niining gipanghimakak.

Lakip nga mihimakak sa maong alegasyon mao mismo ang sakop sa MMT nga si Misty Majistrado ug ang asawa mismo sa konsehal nga si Gina.

Giangkon ni Jagmoc nga daghan ang miduol kaniya nga magpatabang apan dunay iyang mabalibaran tungod sa iya usab nga kawad-on. Sa pikas bahin, gisalikway usab sa konsehal ang pagduda sa oposisyon nga siya gipalagpot sa Bando Osmeña Pundok Kauswagan (BOPK).

Gituohan sa oposisyon nga gi-junk si Jagmoc sa BOPK tungod kay kini giingong maoy nangiwit sa mga survey nga gipahigayon sa grupo.

Alang kang Jagmoc, wala’y kapasikaran ang maong pagduda tungod sa iyang pagtoo nga modaug lang gihapon kung siya magpasubli sa katungdanan. Wala pa masayod ang konsehal kung unsay iyang buhaton kung mapupos na ang iyang termino unya sa buwan sa Hunyo.

Matud ni Jagmoc nga padayon pa niyang gihuna-huna ang iyang ugma ug posibleng siya manguma na lang ngadto sa probinsya sa Bohol.

Gipadayag hinoon sa konsehal ang iyang kaandam pagdawat og tanyag kung kuhaon nga consultant sa City Hall human sa iyang termino. (Elly Bolonos)    (BANATNEWS)