Suroy-suroy sa Sugbu malampuson

CEBU, Philippines - Malampuson kaayo ang tulo ka adlaw nga Suroy- Suroy Sugbo Southern Trail nga gisalmutan sa labing menus 300 ka mga bisita lakip na sa mga turistang langyaw.

Gibutyag kini ni Glenn Soco nga nagpapili karon pagka- bise gobernador uban ni Gobernador Gwen Garcia nga mipaluyo sa Suroy -Suroy Sugbo sulod na sa taud-taod na nga panahon.

Matud pa ni Soco nga bisan pa gani kun wala siya makahukom sa pagsulod sa politika apan daan na siya nga nagpaluyo sa programa ni Gobernador Garcia nga nagpalambo sa turismo sa Sugbo.

Si Soco miingon nga bisan diha pa siya sa pribadong sektor nakita na niya kun unsa ka importante ang programa nga gipasiugdahan sa gobernador.

Midugang si Soco nga naghatag kini og kahigayonan sa mga opisyal lokal sa pagpalambo sa ilang kultura ingon man sa lokal   nga produkto.

Gawas niini mapakita usab nila ang maanindot nga lugar nga makadani unya sa mga bisita ilabi na gayud sa mga turista.

Midugang si Soco nga lahi ang Suroy Suroy Sugbo karong tuiga gumikan kay miuban man si Gilberto “Gibo” Teodoro nga nagpapili pagka- presidente ingon man si Senador Loren Legarda nga nagpapili pagka bise presidente ingon ug ang duha nga midagan pagka senador nga si Gwen Pimentel ug Gilbert Remulla.

Gisugdan ang Suroy Suroy sa lungsod sa Minglanilla padulong sa nagkalain-laing lungsod sa kasadpang bahin sa probinsya sa Sugbo dayon gitapos kini sa dakbayan sa Talisay.   (Pepe Sollano)    (BANATNEWS)