Gumikan sa kahiubos asawa naghikog

CEBU, Philippines - Gumikan sa kahiubos ,namatay ang usa ka 23-anyos nga asawa human kini maghikog pinaagi sa paghikot og pisi sa iyang li-og sulod sa ilang balay sa barangay Tabunok, dakbayan sa Talisay kagahapon sa buntag.

Ang naghikog giila nga si Daisy Jaimy, nga taga Tabunok ug may tulo ka mga anak.

Matud pa ni PO1 Jundave David ug PO2 Erwin Denila sa Talisay City Police Station nga si Ronald Jaimy, 26, kinsa maoy bana ni Daisy, nagtrabaho isip welder sa barangay Cogon, dakbayan sa Sugbo.

Nasayran gikan kang POl David ug PO2 Denila nga sa wala pa maghikog si Daisy, namahaw pa ang pamilya niini diin gihungitan pa ni Ronald ang ilang mga anak ug human niini, mibiya kini sa ilang balay tungod kay motambong sa trabaho.

Dihang nakalakaw na si Ronald, may silingan sila nga nangita kang Daisy ug gitubag kini sa iyang anak nga natulog ang iyang inahan nga naghikot og pisi sa liog.

Busa gidali kini pagsusi sa silingan nga wala magpaila ug maoy misugat sa iyang panan-aw nga wala nay kinabuhi si Daisy.

Busa gisumbong dayon ang maong hitabo ngadto sa kapolisan sa dakbayan kinsa mitubag usab dayon sa maong alarma.

Matud pa nila ni PO1 David ug PO2 Denila nga kanunay mahiubos si Daisy tungod kay tagdugay mouli sa ilang balay ang iyang bana nga si Ronald kay kuno malangay kini sa inom uban sa iyang mga higala.

Si PO1 David midugang nga daghang higayon na nga misuway kuno sa paghikog si Daisy kung magkaaway na kini ug ang iyang bana apan masanta dayon kini kun mabantayan ni Ronald.

Hinuon walay nakitang foul play ang kapolisan sa kamatayon ni Daisy. – BANAT NEWS