Tulo nangapaig

CEBU, Philippines - Tulo ka managsuong mga bata ang napaig dihang nasunog ang ilang panimalay sa Saint Martin Village, sa dalan A.S. Fortuna, barangay Banilad, dakbayan sa Mandaue nga gialarma sa kabomberohan alas 9:25 ang takna sa miaging gabii ug nakontrolar sulod sa duha ka minutos.

Si SFO3 Roy Garcia, imbestigador sa Bureau of Fire Protection (BFP) miila sa mga namatay nga mao sila si Mark Punsal, 6, Gideon Punsal, 2, ug sa igsuong babaye nga si Joey, 4.

Ang inahan sa napaig nga tulo ka mga bata nga si Aileen giingong wala diha sa ilang panimalay atol sa maong hitabo kay migawas kini ug nag-internet.Matud pa ni Garcia nga ang apohan sa mga namatay nga si Wilmina Punsal, 52, mao ray nahibilin ug dali kaayong nakagawas dala ang 3-anyos niining apo nga si James kinsa parehong nakabaton og mga paso sa ilang kalawasan.

Si Garcia miingon nga dihang nakamatikod si Wilmina sa nagpuot na sa aso ang sulod sa ilang panimalay maong gisapupo dayon niini ang 3-anyos nga apong lalaki ug midali sa paggawas.

Diha nalang niya mamatikding nahabilin ang tulo niya ka apo diha sa sulod apan uwahi na sanglit naputos na sa kalayo ang balay, pipila sa mga silingan niini ang misuway unta sa pagsulod aron kuhaon ang tulo apan napakyas gihapon.

Sumala pa ni Garcia nga upat ka tuig nang naputlan og kuryente ang panimalay sa mga Punsal ug lamparilya nalang ang ilang gigamit matag gabii.

Nagtuo karon ang kabomberohan nga natumba ang lamparilya sa sulod sa lawak nga gikatulgan sa tulo ka managsuong nakalas ug maoy nakaingon sa pagkaylap sa kalayo.

Si Garcia miingon nga wala na makatapon ngadto sa silingang panimalay ang kalayo tungod kay dali nilang nakontrolar ang kalayo. 

 Gibana-banang mokabat sa P70 mil ang danyos sa panimalay ug kabtangang naugdaw nga ginama sa gaay. - Ug Bong Soriano (BANAT NEWS)